२१ असार,काठमाडौं । मूसलधारे पानीमा निथु्रक्क भिजेर संविधानसभा भवनमा प्रवेश गरेका कांग्रेस नेता खुमवहादुर खड्का, पूर्व सभासमुख तारानाथ रानाभाट सहितको टोलीलाई संविधानसभा अध्यक्ष सुवास नेम्वाङले पानीमा भिजेकोमा सहानुभूति दिए ।
नेपाली कांग्रेस सनातन हिन्दू राष्ट्र महाअभियानका संयोजक समेत रहेका खड्काबाट हिन्दू ज्ञापनत्र बुझिसकेपछि नेम्वाङले भने-‘पानीमा भिजेर यहाँसम्म आइपुग्नुभयो, तपाईहरुको माग म संवाद समितिसम्म पुर्याइदिन्छु । यो पानीले चाहिँ शुभ संकेत गरेको हो कि होइन थाहा भएन ।’
संविधानमा नेपाललाई धार्मिक स्वतन्त्रता सहितको सनातन हिन्दु राज्य कायम गराउन कांग्रेसमा खुमवहादुरको नेतृत्वमा अभियान चलिरहेको छ । सो अभियानका नेताहरु तारानाथ रानाभाट,लक्ष्मण घिमिरे,हरिबोल भट्टराईहरु पानीमा निथु्रक्क भिजेरै सभाध्यक्षलाई भेट्न पुगेका थिए ।
हिन्दू राज्य कायम गराउनुपर्ने खड्काको मागलाई सभाध्यक्ष नेम्वाङले संवाद समितिमा पठाइदिने आश्वासन दिए । उनले भने-‘जनताका बिभिन्न सुझावहरु आएका छन्,तपाइहरुको यो माग पनि म संवाद समितिमा पठाइदिन्छु ।’