समाचार टिप्पणी
२६ असोज, काठमाडौं । नयाँ संविधानलाई अस्वीकार गर्दै दुई महिनासम्म मधेस झरेर जनतालाई आन्दोलनमा उतारेका मधेसी मोर्चाका नेता महन्थ ठाकुर, उपेन्द्र यादव, राजेन्द्र महतो र विजय गच्छदारलगायतलाई मधेसमा आफ्नै कार्यकर्ताले ‘गद्दार’ को संज्ञा दिन थालेका छन् ।
संसद भवनमा पसेर मधेसी मोर्चाका सांसदले संविधानलाई स्वीकार गरेपछि मधेसमा मोर्चाका नेताहरुविरुद्ध आक्रोश देखिएको हो ।
मोर्चाभित्र तिव्र अन्तरविरोध र फुट देखिएको छ भने मधेसको आन्दोलन अब मोर्चाको नियन्त्रणभन्दा बाहिर जाने संकेतहरु देखिएका छन् ।
संविधानसभामा भोट हालेकै दिन तमलोपाका संसदीय दलका उपनेता बृजेशकुमार गुप्ताले पार्टी अध्यक्ष महन्थ ठाकुरका हातमा राजीनामा थमाएका छन् । त्यस्तै अनिलकुमार झा नेतृत्वको सदभावनाकी सहअध्यक्ष सरिता गिरीले पनि पार्टीबाट राजीनामा दिइसकेकी छिन् ।
मोर्चाका नेताहरुले गद्दारी गरेको र मधेसी जनतालाई धोका दिएको भन्दै मधेसी मोर्चाभित्र भाँडभैलो मच्चिएको छ ।
संयुक्त मधेसी राष्ट्रिय आन्दालने समितिका सहसंयोजक गोपाल ठाकुरले अब मधेसी मोर्चाका नेताहरुलाई मधेस आन्दोलनमा सहभागी हुने नैतिक अधिकार समाप्त भएको बताएका छन् ।
मोर्चाका नेताहरुले प्रधानमन्त्रीको निर्वाचनमा ओली वा कोइराला जसलाई मतदान गरेको भए पनि संविधानलाई स्वीकार गरेको ठहरिने ठाकुरले बताएका छन् ।
सोमबार बोलाइएको मधेसी मोर्चाको बैठक राजेन्द्र महतो नेतृत्वको सदभावना पार्टीले बहिस्कार गरेको छ । तर, स्वयं महतोकै पत्नी शैलुकुमारी महतोसमेत संसदको मतदानमा सहभागी भएकी र महतोको स्वीकृतिमै सदभावना पार्टीका नेताहरुले सुशील कोइरालालाई मतदान गरेको मोर्चाका नेता बताउँछन् ।
सोमबारको बैठक सदभावना पार्टीले बहिस्कार गरे पनि मंगलबार राजधानीमा फेरि मोर्चाको बैठक डाकिएको छ ।
गच्छदारको पार्टीमा पहिरो
उता फोरम लोकतान्त्रिकका अध्यक्ष विजयकुमार गच्छदार संविधानमा सपथ खाँदै उपप्रधानमन्त्री बनेपछि उनको पार्टीमा पहिरो जान थालेको छ ।
सोमबारै बारा र पर्साका फोरम लोकतान्त्रिकका नेताहरुले सामुहिक राजीनामा दिएका छन् । राजीनामा दिनेहरुमा पर्सा जिल्ला अध्यक्ष शशी कपूर मियाँ, बारा जिल्ला अध्यक्ष ओमप्रकाश चौधरी, पूर्वराज्यमन्त्रीद्वय कलावती पासवान र दूर्गादेवी महतोसमेत छन् । त्यस्तै सामुहिक राजीनामा दिनेमा फोरम लोकतान्त्रिकका केन्द्रीय सदस्य कृपासिन्धु चौधरी समेत छन् ।
गच्छदार सरकारमा गएपछि उनको मोर्चा औपचारिकरुपमा फुटेको छ । मोर्चाबाट शरदसिंह भण्डारी लगायत बाहिर निस्किएका छन् ।
गुप्ता के भन्छन् ?
मधेसी नेताहरुले संसदमा पुगेर मतदान गरेपछि तराई मधेस राष्ट्रिय अभियानका संयोजक जेपी गुप्ताले त्यसलाई गद्दारीको संज्ञा दिएका छन् ।
मधेसी मोर्चाका चारवटै दल र विजय गच्छदारले मधेस आन्दोलन, मधेसी जनता र मधेसका सहिदहरुलाई धोका दिएको गुप्ताको आरोप छ । संविधानलाई मानेर मधेसी मोर्चाका नेताहरु राज्यपक्षमा गएको गुप्ताको भनाइ छ ।
मधेसमा एउटा क्रन्तिकारी पार्टी भइदिएको भए गच्छदार, राजेन्द्र महतोहरुले यस्तो दुस्कार्य गर्न नसक्ने भन्दै गुप्ताले मधेस आन्दोलनका मुद्दा समाप्त नभएको बताएका छन् ।
मधेसमा गडबडी यथावत
केपी ओली प्रधानमन्त्री बनेकै दिन रौतहटको गौरमा ओली र विजय गच्छदारको पुत्ला जल्यो । पुत्ला जलाउने कार्यक्रममा रादभावना पार्टीका नेता कार्यकर्ता सहभागी थिए ।
प्रधानमन्त्रीले सपथ ग्रहण गरेको दिनमा चाँहि जनकपुरको रामजानकी मन्दिरमा मधेस अधिकार संघर्ष समितिका कार्यकर्ताले केपी ओली, सुशील कोइराला र प्रचण्डका नाममा क्षमा पूजा गरे ।
पशुपतिनाथ मन्दिरमा कलाकार मनोज गजुरेलले भारतीय प्रधानमन्त्री नरेन्द्र मोदीको भेषमा क्षमा पूजा गरेकै जवाफजस्तो देखिने गरी सुशील, केपी र प्रचण्डको अभिनयसहित मधेसी कार्यकर्ताले तीन नेताको क्षमा पूजा गरे ।
व्यवस्थापिका संसदमा मोर्चाका नेताहरु प्रवेश गरेर संविधानलाई स्वीकार गरे पनि मधेसको बन्द र हडताल पूर्ण रुपमा खुलेको छैन । मोर्चाका नेताहरुले आन्दोलन फिर्ता लिएको घोषणा पनि गरेका छैनन्, तर उनीहरुले आफ्नै कार्यकर्ता र जनताको समर्थन गुमाएका छन् ।
जनकपुरलगायत पूर्वी तराईको जनजीवन अहिले पनि सहज हुन सकिरहेको छैन । तर, मोर्चाका नेताप्रति आन्दालनेकारीको विश्वास गुमेका कारण अब आन्दोलन साम्य हुने अनुमान गरिएको छ ।
साथै दसैंजस्तो चाडबाड आउन लागेकाले बन्द हडताल क्रमशः खुल्ने संकेतहरु देखिएका छन् ।
कसले ‘फसायो’ महन्थ ठाकुर र राजेन्द्र महतोलाई ?
आखिर राज्यपक्षसँग कुनै सहमति नै नगरी मधेसी मोर्चाका नेताहरु किन व्यवस्थापिका संसदमा भाग लिए ? मधेस आन्दोलनकारीको भाषामा भन्दा आखिर कसले फसायो महन्थ ठाकुर, राजेन्द्र महतोजस्ता नेतालाई ?
सूत्रहरुका अनुसार मधेसी मोर्चाका नेताहरु संसदमा प्रवेश गर्नुका पछाडि तीनवटा कारण छन्, पहिलो कारण-मतदानमा सहभागी नहुँदा कारवाहीमा परिने र संसद सदस्यता एवं पदै गुम्ने डर । दोस्रो- सुशील कोइरालालाई जितिहाले मन्त्री खान पाइने लोभ । र, तेस्रो भारतीय गुप्तचरका पूर्वप्रमुख एबी माथुर र भारतीय राजदूतले दिएको निर्देशन ।
सूत्रहरुका अनुसार भारतीयहरुको उक्साहटमा लागेका मधेसी मोर्चाका नेताहरुलाई दूतावासले सुशील कोइरालाका पक्षमा मतदान गर्न रातारात निर्देशन दिएपछि उनीहरु आँखा चिम्लिएर व्यवस्थापिका संसदमा प्रवेश गरेका हुन् ।
सुशील कोइरालाले चुनाव जितेको भए मन्त्री बन्न पाइने आशमा मोर्चाका नेताहरुले कोइरालालाई मतदान गरेको मोर्चाभित्र चर्चा छ ।
अब के होला मधेसमा ?
मधेसी मोर्चाका नेताहरु बदनाम भएपछि अब मधेसमा के होला ? अब त्यहाँ भारतको पक्षधर मानिने मोर्चाका नेताहरु कमजोर हुने र पश्चिमी राष्ट्रको पक्षधर मानिने सिके राउत मार्का हाबी हुने संकेत देखिएको छ ।
भारतीयहरुकै सल्लाह र निर्देशनमा मोर्चाका नेताहरुले रातारात संविधानलाई स्वीकार गरेपछि अब मधेसमा भारतीय प्रभाव एकाएक कमजोर बन्न् पुगेको छ । भारततर्फ गएर, भारतीय नेताहरुको मेसमा खाना खाँदै मधेस आन्दोलनमा सहयोग लिने राजेन्द्र महतो लगायतका नेताहरुको ‘बिजनेस’ लाई अन्ततः भारतले नै बुमर्याङ बनाइदिएको छ ।
केपी ओली प्रधानमन्त्री हुनासाथ भारतीय प्रधानमन्त्री नरेन्द्र मोदीले ओलीसँग मिलेर अघि बढ्ने इच्छा देखाएका छन् । मोदीले ‘फेरि मधेश हैन, देश’ को नीति लिँदै नेपालका बारेमा ‘कोर्ष करेक्सन’ गर्न खोजेपछि मधेसी मोर्चाका नेताहरुले बल्ढ्याङ खाएका छन् ।
घटनाक्रमले देखाइसकेको छ कि अब भारतले महन्थ ठाकुर र राजेन्द्र महतोलाई भन्दा बढी केपी ओली र विजय गच्छदारहरुसँग सहकार्यको प्रयास अगाडि बढाउनेछ ।
तर, यसको प्रतिफलस्वरुप मधेसको आक्रोशित जनमतमा पश्चिमाहरुले चलखेल गर्ने र भारतले छाडिदिएको फिल्डमा विखण्डकारीहरु फस्टाउने खतरा पनि बढेको छ ।
विखण्डनको वकालत गर्दै अाएका डा. सिके राउतले राजेन्द्र महतो लगायतले देखाएको असन्तुष्टि र सरिता गिरी लगायतले दिएको राजीनामालार्इ फेरि मधेसका जनता झुक्याउने अर्को नाटकको संज्ञा दिएका छन् ।
मधेसका चर्चित भनिएका नेताहरु यसरी बदनाम हुनु भनेको अर्को शक्तिलाई मलजल पुर्याउनु हो ।
ओली सरकारले मधेसी जनताको हितमा काम गर्यो भने त्यहाँ एमाले हावी नहोला भन्न पनि सकिन्न । मधेसी मोर्चाका नेताहरु बदनाम भएपछि अब मधेसमा राजनीतिक जमिनमा एकप्रकारको ‘भ्याकुम’ देखिएको छ ।
मधेसी मोर्चाका नेताहरु मधेसका जनताप्रति डा. बाबुराम भट्टराईजति पनि इमान्दार नदेखिएको चर्चा सुरु भएको छ यतिबेला मधेसमा ।
