विश्वको सबैभन्दा शक्तिशाली देशका सबैभन्दा शक्तिशाली व्यक्ति अर्थात् विश्वका नम्वर वान व्यक्ति अमेरिकी राष्ट्रपति बाराक ओबामाको जिवनशैली कस्तो होला ? यो विषय दुनियाभरकै चासोको विषय हो । ओबामाले खाँदा पनि, शौच गर्दा पनि, डुल्दा पनि, खोक्दा पनि तथा हाँस्दा पनि त्यो समाचारको विषय बन्छ । बाराक ओबामाले चढ्ने बस कस्तो छ होला ? अर्थात् उनका लागि अमेरिकी सरकारले दिएको सरकारी गाडी कस्तो छ होला ? यो हाम्रोलागि जिज्ञासाको विषय हो ।
बाराक ओबामाका लागि संसारकै सबैभन्दा महंगो कार चढूँ भनेपनि नपुग्ने केही छैन । तर उनी देश दौडाहामा निस्किँदा प्रायः उनको आफ्नो लक्जरी बस चढ्ने गर्छन् । अत्याधुनिक सुविधासम्पन्न त्यो लग्जरी बस निकै शानदार छ । यो बस पूरै रुपमा हतियार तथा सुरक्षा प्रविधिले युक्त छ ।
ओबामाको यो बसको मूल्य झण्डै ११ लाख डलर पर्छ । अमेरिकामा यस्ता खालका केवल दुइ वटा मात्र बस रहेको बताइन्छ । जसमध्ये एउटा ओबामाको छ भने अर्को विपक्षी दल रिपब्लिकनका प्रमुखको ।
यो बसमा पंचर नहुने टायर छ । बसभित्र राष्ट्रपतिका लागि सुत्ने, बस्ने, आराम गर्ने तथा काम गर्नका लागि समेत प्रसस्त ठाउँ छ । यो बसमा कालो सिसा रहेको कारण बाहिरबाट भित्र रहेको व्यक्ति देख्न सकिँदैन तर भित्रको व्यक्तिले बाहिरको सबै कुरा प्रष्टै देख्छ । यसको सिसा गोली प्रतिरोधी छ । बसमा अत्याधुनिक सूचना प्रविधि सेवा पनि छ । ओबामाले यो बसभित्रैबाट महत्वपूर्ण सन्देश तथा घोषणा लाइभ गर्न सक्छन् र त्यो सिधै संचारमाध्यमबाट प्रशारण हुन सक्छ ।
