२५, असोज काठमाडौं । कायम-मुकायम प्रधानन्यायाधीश दामोदरप्रसाद शर्माको सजिलै चिन्न नसकिने गरी स्वरुप परिवर्तन भएको छ । टोपीबाट बाहिरै निस्किएको लामो सेतो कपाल, अनि सिमलको भुवाजस्तो सेतो दाह्रीको सकलमा देखिनुहुने शर्मासँग यतिबेला न कपाल छ, न त दाह्रीजुँगा नै ।
लामो समयदेखि दाह्रीको पहिरनमा देखिँदै आउनुभएका आध्यात्मिक साधक शर्माले जमरेऔंसीकै दिनदेखि १५ दिनसम्म देशैभरिका अदालत बन्द गरेर आफ्नो निवास आरुबारीमा सप्ताह पुराण लगाउने क्रममा दाह्री र कपाल खौरनुभएको हो । दाह्रीजुँगा सफाचट पारेपछि केहीले फेसबुकमा शर्माको तस्वीर राखेर ‘लौ चिन्नोस्’ भनेका छन् । हुन पनि दाह्री काटेको अवस्थामा उहाँलाई चिन्न निक्कै गाह्रो देखिएको छ ।
अदालतमा अझैसम्म मनपरी दशैं विदा
सरकारले कर्मचारीहरुलाई दशैंमा सात दिनमात्रै विदा दिने गरे पनि न्यायधीश र अदालतका कर्मचारीलाई भने मालामाल हुँदै आएको छ । सरकारले विदा नतोकेको दिनलाई पनि ‘सार्वजनिक विदा’ घोषणा गरेर अदालतले ‘विदाका दिन पनि अदालत खुल्ला रहने’ भन्दै अतिरिक्त भत्ता पड्काउने र जनतालाई झुक्याउने गरेको छ ।
गृहमन्त्रालयले गरेको परिपत्र र सोअनुसार बनेको सरकारी विदा सम्बन्धी क्यालेन्डरमा दशैं विदा ७ दिनमात्रै उल्लेख भए पनि न्यायाधीश र अदालतका कर्मचारीले अहिलेसम्म मनपरी ढंगले १५ दिनसम्म दशैं विदा उपभोग गर्दै आएका छन् ।
गृह मन्त्रालयका अनुसार ०७० को दशैंमा सरकारी विदा असोज १९ को घटस्थापनामा एक दिन, असोज २५ देखि ३० गते -फूलपातिलेखि द्वादशीसम्म) ५ दिन र कात्तिक १ गते कोजाग्रत पूणिर्माका दिन १ दिन गरी सात दिनमात्रै छ । तर, सर्वोच्च अदालतले सरकारी विदा नपरेको दिनलाई समेत ‘विदा’ घोषणा गरी सो दिन अदालतमा उपस्थित हुने न्यायधीश र कर्मचारीलाई एक दिनको तलव बराबरको भत्ता खुवाउने बताएको छ ।
सर्वोच्च अदालतको सर्कुलर अनुसार असोज २० देखि २५ गतेसम्म सरकारी विदा नपरेका दिनमा समेत अदालतमा खटेका कर्मचारी र न्यायाधीशले विशेष भत्ता खाने भएका छन् । सर्वोच्च अदालतका शाखा अधिकृत देवेन्द्र ढकालद्वारा जारी परिपत्रमा ‘विजयादशमी ०७० को उपलक्ष्यमा यही मिति २०७० असोज १९ गते घटस्थापनाका दिनदेखि ०७० कात्तिक १ गते कोजाग्रत पूणिर्माका दिनसम्म अदालतहरु सार्वजनिक विदामा बन्द रहने हुँदा’ भनिएको छ ।
सरकारले तोकेको सार्वजनिक विदाको सूचीमा यति लामो सार्वजनिक विदा कतै उल्लेख छैन । ‘सरकारले अन्य सबै कर्मचारीलाई ७ दिन विदा तोकेको अवस्थामा न्यायाधीशले आफैं क्यालेन्डर बनाएर १५ दिन विदा लिँदै आएका छन् ।’ एक अधिवक्ताले अनलाइनखबरसँग भने- ‘अरु सरकारी कर्मचारीले दशैंमा ७ दिनमात्रै विदा पाउने तर न्याय गर्नेहरुले नै १५ दिन विदा लिएर त्यसबेला काम गरेवापत थप भत्ता खाने चलन न्यायसंगत देखिँदैन ।’
अदालतका कर्मचारीलाई अन्य कर्मचारीभन्दा दोब्बर विदा दिँदा अदालतमा न्याय माग्न जानेहरुमाथि पनि अन्याय भएको कानूनविद्को प्रतिक्रिया छ । सर्वोच्च अदालतले दिएको दसैंको ‘सार्वजनिक विदा’ गृहमन्त्रालयले घोषणा गरेको विदाको सूचीसँग मेल खाँदैन । सरकारले गरेको निर्णयमा अदालतमा छुट्टै व्यवस्था रहने कतै उल्लेख गरिएको छैन ।
अन्य सरकारी कार्यालयहरु खुल्ला रहेकै बेला सोमबारदेखि अदालतमा १५ दिने छुट्टीको सूचना टाँसेर कायम-मुकायम प्रधानन्यायाधीश शर्माले आफ्नो निवासमा सप्ताह पुराण शुरु गर्नुभएको हो । शर्माको घरमा पुराण वाचनका लागि पण्डित भारतको वृन्दावनबाट झिकाइएको छ ।
राष्ट्रपतिसमेत आरुबारीमा
कामु प्रधानन्यायाधीशको घरमा पुराण सुन्न र वृन्दावनका पण्डितबाट आर्शिवाद थाप्न राष्ट्रपति डा. रामवरण यादवसमेत पुग्नुभएको छ भने न्यायपरिषदका सदस्य एवं न्यायाधीशसमेत आरुबारी पुगेका छन् । पुराणको दौडधूपका क्रममा कामु प्रधानन्यायाधीश शर्मा कुर्सीबाट लडेर टाउकोमा सामान्य चोट लागेपछि नर्भिक अस्पतालमा चेकजाँचसमेत गरिएको थाहा भएको छ ।