२७ कात्तिक, काठमाडौं । फिफाको उत्कृष्ट गोल अवार्डको मनोनयनमा जाल्टन इभ्राहिमोभिचसँगै रोविन भानपर्सी र जेम्स रोड्रिग्वेज परेका छन् ।
फिफा पुस्कास अवार्डका मनोनयनमा परेका १० जनाको नाम सार्वजनिक गरेको छ । जसमा इभ्राहिमोभिच, भानपर्सी र रोड्रिग्वेजसँगै डिएगो कोष्टा, टिम काहिल लगायत छन् ।
सन् २०१३ को अवार्ड इभ्राहिमोभिचले जितेका थिए । ३३ वर्षीय जाल्टन यो वर्ष लिग वानमा बास्टिनविरुद्ध गरेको ‘ब्याकहिल फ्लिक’ गोलका लागि मनोनयनमा परेका छन् ।
स्वीडेनका जाल्टन अघिल्लो पटक इंग्ल्याण्डविरुद्ध गरेको ओभरहेड किक गोलका लागि पुस्कास अवार्ड हात पारेका थिए ।
अष्ट्रेलियाका टीम काहिलले विश्वकपमा नेदरल्याण्डविरुद्ध गरेको भली गोल मनोनयनमा परेको छ । नेदरल्याण्डका भानपर्सीले विश्वकपमै स्पेनविरुद्ध गरेको गोल पनि प्रतिस्पर्धामा छ ।
स्पेनलाई ५–१ ले हराउने क्रममा भानपर्सीले गरेको यो हेड गोल निकै उत्कृष्ट थियो । करिव ४० यार्ड टाढाबाट आएको पासमा भानपर्सीले दुई डिफेण्डरको बीचमा दौडिएर हेड गरे । उनले स्पाइडर म्यानको शैलीमा हावामा उडेर हेड हानेका थिए ।
विश्वकपमै उरुग्वेविरुद्ध गरेको गोलका कारण कोलम्बियाका रोड्रिग्वेज पुस्कास अवार्डको अन्तिम १० प्रतिस्पर्धीमा छन् । गोल्डेन बुट विजेता रोड्रिग्वेजले छातिले बल नियन्त्रिणमा लिँदै करिव २५ यार्ड टाढाबाट गोल गरेका थिए ।
डिएगो कोष्टाले गत सिजन एथ्लेटिको मड्रिडबाट खेल्दा ला लिगामा गेटाफेविरुद्ध ओभरहेड किकमा गरेको गोल मनोनयनमा परेको छ ।