१४ असार, काठमाडौं । राष्ट्रिय प्रजातन्त्र पार्टी नेपालले हिन्दु राष्ट्र, संवैधानिक राजतन्त्रलगायत विषयमा आफूहरुलाई मत विभाजन गर्न नदिए संविधानसभामा अवरोध गर्ने चेतावनी दिएको छ ।
राप्रपा नेपाल संसदीय दल र पदाधिकारीको सोमबार सिंहदरबारमा बसेको संयुक्त बैठकले संघीयताभन्दा पनि स्थानीय स्वायत्त शासन विधिलाई अगाडि बढाउन र सो सम्बन्धमा मत विभाजन गरेर बहस तथा छलफलमा भाग लिन पाउनुपर्ने निर्णय गरेको हो ।
पार्टी अध्यक्ष कमल थापाले आफूहरुको मागको सम्बन्धमा संविधानसभा बैठकमा आवाज उठाउने बताए ।
प्रमुख सचेतक दिलनाथ गिरीले मस्यौदा समितिमा समेत केही दलले अरु दलको विचार तथा मान्यतालाई अस्वीकार गरेकाले बाध्य भएर विरोध गर्नुपरेको बताए ।
बैठकले राजतन्त्र, हिन्दूराष्ट्रलगायतका विषयमा जनमतसंग्रह गरी त्यसको व्यवस्था नयाँ संविधानमा उल्लेख गर्नुपर्ने माग गर्दै आएको छ ।