रविन भट्टराई
२२ साउन, ताप्लेजुङ । ताप्लेजुङको फुङलिङका बासिन्दाले शुक्रबार सडकमै धान रोपाइँ गरेका छन् । बजार भित्रको पक्की सडक स्तरोन्नती नभएपछि स्थानीयबासीले विरोध स्वरुप सडकमा धान रोपेका हुन् ।
फुङलिङ बजारको दोवाटो छुट्ने ठाउँदेखि पुरानो बैंक लाईन हुँदै पराजुली चौकसम्मको हिलाम्मे सडकमा रोपाइँ गरिएको छ । रोपाई गर्नुअघि सहभागी हुनेहरुले ‘भत्किएको सडक चाहिँदैन, जनतालाई सास्ती दिन पाइँदैन, भत्किएको सडक पुनर्निर्माण गर’ भन्दै ताप्लेजुङ नगरपालिकामा निमित्त कार्यकारी अधिकृत बिमला थापालाई ज्ञापन पत्र बुझाएका थिए ।
ज्ञापन पत्र बुझाउन जानेहरुले धान रोपाइँमा प्रयोग हुने कुटो, कोदालो र धानको बिउ पनि सँगै लिएर गएका थिए । खेत जोत्न प्रयोग गरिने गोरुको काममा पक्की सडकलाई सम्याउन पिकअप गाडीको प्रयोग गरिएको थियो ।
गाडीको पछाडिपट्टकिो भागमा तीनवटा टायर बाधेंर हिलाम्मे सडक सम्याएपछि रोपाहारले बेठीको भाकामै ‘भत्किएको सडक चाहिँदैन, जनतालाई सास्ती दिन पाइँदैन, भन्दै नारा लगाएका थिए ।
रोपाइँ आयोजक समितिका संयोजक भण्डारीले भने-‘पक्की सडक धान रोप्ने हिलो भन्दा गएगुज्रेको हुदा सम्म यसको स्त्तरोन्ततीका लागि कसैबाट पहल नभएपछि धान रोप्नु शिवाय अरु उपाय देखेनौं ।’
तीनबर्ष अघि पक्की भएको सडक त्यसको बर्षदिन पछिदेखि नै उक्किन थालेको हो । तोक्मे शान्तिटोलको उपल्लो भागमा चैत ९ गते लागेको आगोका कारण क्षतिग्रस्त भएको सडकमा नेपाल टेलिकमले अप्टिकल फाइवर बिछ्याउन फेरि सडक खनेर पुर्ननिमार्ण गरेको छैन ।
बजार भित्रकै पक्की सडकमा चप्पल जुत्ता खोलेर हिड्नुपर्ने अवस्था आएपछि आन्दोलन गर्नुपरेको आन्दोलन अगुवाई समितिका सदस्य गायत्री निरौलाले जानकारी दिए ।
