४ जेठ, काठमाडौं । नेपाल आयल निगमले मंगलबार सरकारको ३ अर्ब ६४ करोड रुपैयाँ ऋण तिरेको छ । निगमले अर्थ मन्त्रालयलाई ऋण तिरेको हो ।
अब सरकारलाई ४ अर्ब रुपैयाँ ऋण तिर्न बाँकी रहेको नेपाल आयल निगमका प्रवक्ता मुकुन्द घिमिरेले जानकारी दिए ।
३ महिना अघि मात्रै सरकारको ३ अर्ब ऋण तिरेको आयल निगमले फेरि ३ अर्ब ६४ करोड रुपैयाँ ऋण भुक्तानी गरेको हो ।
आयल निगमले झण्डै १ अर्ब रुपैयाँ कर्मचारीको बोनसका लागि छुट्याएर राखेको छ । अब सरकारको ४ अर्ब रुपैयाँ ऋण तिर्नासाथ आयल निगमका कर्मचारीले बोनस रकम हात पार्नेछन् ।
आयल निगमलाई अहिले पेट्रोलमा लिटरमा झण्डै १३ रुपैयाँ नाफा छ भने डिजेलमा पनि १२ रुपैयाँ नाफा छ ।
ग्यासमा पनि निगमलाई प्रतिसिलिन्डर ९२ रुपैयाँ नाफा छ । अन्तर्राष्ट्रिय बजार अनुरुप मूल्य समायोजन गर्ने भनिएपनि निगमले तेलको मूल्य समायोजन नगरेको लामो समय भइसकेको छ ।
