चलचित्रको बजार फस्टाउन थालेपछि अहिले यस बिषयमा पढाई हुने विभिन्न एकेडेमीको खोजी पनि सुरु भएको छ । नेपाली चलचित्र क्षेत्रमा आउने कलाकार, निर्देशक, छायांकार, सम्पादक लगायतले अध्ययन गरेर आउनुपर्ने चर्चा सुरु भएको लामो समय भैसकेको छ । यहि कुरालाई ध्यानमा राख्दै नेपाली चलचित्रका चर्चित हस्तीहरुको संलग्नतामा फिल्म स्कुल संचालनमा आउने भएको छ ।
वुझिएअनुसार केही दिनमा नै उद्घाटन हुने यो स्कुलको हाल धमाधम तयारी भैरहेको छ । जसमा बलिउडमा समेत आफ्नो दरिलो उपस्थिती जनाइसकेका कलाकार सुनिल थापा, निर्देशक उज्ज्वल घिमिरे, निर्माता छविराज ओझा समेत आवद्ध छन् । यस्तै, चर्चित निर्देशक लक्ष्मीनाथ शर्मा, कलाकार विश्व बस्नेत लगायत पनि यो स्कुलमा आवद्ध छन् ।
यसका संचालकहरुले अहिलेसम्म यो बिषयमा केही जानकारी दिएका छैनन् । तर, निर्देशन, क्यामेरा, सम्पादन लगायतका विधामा १ बर्षको कोर्स बनाएर अध्यापन गराउने तयारी गरिएको छ । स्कुलको नाम ‘एभरेष्ट फिल्म एकेडेमी’ राखिएको छ ।
भारतबाट समेत चर्चित चलचित्रकर्मी ल्याएर यो कलेजमा अध्यापन गराइने तयारी थालिएको छ । नेपालका चर्चित चलचित्रकर्मीले यो कलेजमा अध्यापन गराउने छन् । सम्पूर्ण कुरा केही दिनमा गरिने उद्घाटन कार्यक्रममा जानकारी दिने एकेडेमी संचालकहरुले बताएका छन् ।