१५ माघ, काठमाडौं । युवा तथा खेलकुदमन्त्री दलजित श्रीपाइलीले ओलम्पिक कमिटीको विवाद समाधानको लागिसर्वोच्च अदालतको आदेश कार्यान्वयन गराउने बताएका छन् ।
आफूले सहमतिबाटै अघि बढ्न पटक-पटक आग्रह गरेको भन्दै उनले भने, ‘विधि र प्रणालीको सबैले पालना गर्नुपर्छ, अदालतको आदेश कार्यान्यवयन हुनुपर्छ, यसको लागि म सामूहिक छलफलमा समेत बस्छु, सम्भव रहेन भने म टुलुटुलु हेरेर बस्दिन ।’
रिपोर्टर्स क्लब नेपालले शनिबार आयोजना गरेको साक्षात्कारमा मन्त्री श्रीपाइलीले सर्वोच्च अदालतको आदेश कार्यान्वयन गराउन आफूले एक्सन लिने बताए ।
राष्ट्रिय युवा परिषदमा पनि विवाद देखिएको भन्दै उनले समाधानका लागि पहलकदमी लिने बताए । उनले भने, ‘एकलौटी रुपमा ६० जिल्लामा नियुक्ति गरिएको कुरा बाहिर आएको छ, यसबारेमा मेरो ध्यानाकार्षण भएको छ ।’
उनले युवा परिषद्मा सबैलाई समेटेर अगाडि बढ्ने प्रतिवद्धता समेत व्यक्त गरे । मन्त्रालयले १५ वर्षे खेलकुद रणनीति बनाउन लागेको भन्दै उनले भने, खेलकुदको विकासका लागि खेलकुद विश्वविद्यालय, खेलकुद अस्पताल, खेलाडी विमा, खेलाडी कल्याणकारी कोषको स्थापना गर्ने, खेलाडी परिचयपत्र दिन लागेका छौं ।’
