१९ फागुन, काठमाडौं । स्पोटिङ गिजोनमाथि शानदार जित हात पार्दै बार्सिलोना स्पेनिस ला लिगा फुटबलको शीर्ष स्थानमा उक्लिएको छ ।
बुधबार राति भएको खेलमा बार्सिलोनाले गिजोनमाथि ६-१ गोल अन्तरको जित हात पारेको हो ।
घरेलु मैदान नाउक्याम्पमा भएको खेलमा बार्सिलोनाले नवौं मिनेटमा नै लिओनल मेस्सीको गोलबाट अग्रता दिएको थियो । दुई मिनेटपछि नै लुइस स्वरेजले गोल गरे ।
२१ औं मिनेटमा गिजोनका कास्ट्रोले गोल गर्दै टोलीलाई खेलमा फर्काउने संकेत दिए । तर, २७ औं मिनेटमा स्वरेजले दोस्रो गोल गरेपछि पहिलो हाफमा बार्सिलोना ३-१ को अग्रता लिन सफल भयो ।
दोस्रो हाफको सुरुमा नै पाको अलासरले गोल गरे । ६५ औं मिनेटमा नेयमारले गोल गरे भने ८७ औं मिनेटमा राकिटिकले गोल गर्दै बार्सिलोनालाई ६-१ को जित दिलाए ।
जितसँगै बार्सिलोना ला लिगाको शीर्ष स्थानमा उक्लिएको छ । उसको २५ खेलबाट ५७ अंक छ । ५६ अंकसहित रियल मड्रिड दोस्रो स्थानमा छ तर, उसले एक खेल कम खेलेको छ ।
