१२ भदाै, सर्लाही । काठमाडौँ । नायक राजेश हमालले सर्लाही पुगेर बाढी र डुवान पीडितलाई राहात वितरण गरेका छन् । उनले सर्लाहीका सकरौल, सिवनगर, बिनगर्राका बाढी पीडितलाई राहात वितरण गरेका हुन् ।
सर्लाहीको सकरौल, सिवनगर, बिनगर्राका पीडितले राहात नपाएको भन्ने समाचार सञ्चार माध्यममा प्रकाशित भएपछि उनी आफै राहात बोकेर काठमाडौँबाट सर्लाही पुगेका हुन् ।
हमालले करिव १५० घर परिवारलाई राहात वितरण गरेका हुन् । उनले प्रतिपरिवार २० किलो चामल, ५ किलो दाल, १ लिटर तेल, चाउचाउ र वृद्धवृद्धालाई ओढ्ने वितरण गरेका छन् ।
हमालले पीडितलाई सामाजिक सुरक्षा वापतको भत्ताका लागि समेत पहल गर्ने आश्वासन दिएका थिए ।
राहत वितरण गर्नु भन्दा अगाडि नायक हमालले पीडित परिवारको घरघरमा गएर गुनासो सुन्ने र घरमा भएको क्षतिको निरीक्षण समेत गरेका थिए ।
सर्लाहीका बाढी र डुवान पीडित राहात पाउँदा निकै खुसी देखिएका थिए ।
नायक हमालसँगै सामाजिक अभियन्ता नविन यादव र सहयोगी राम ठाकुर राहत सामग्री बोकेर सर्लाही पुगेका हुन् ।
