३० कात्तिक, मलेखु, धादिङ। अन्य गाउँमा चुनावको रन्को चलेको र उम्मेदवारमात्र होइन मतदातासमेत निर्वाचनमा प्रचारप्रसारका लागि लागेको बेला दक्षिणी धादिङको गजुरी गाउँपालिका–६ स्यामैडाडाँका चेपाङले भने वर्षौंदेखिको खानेपानी सपना पूरा गर्न योजना शुरु गरेका छन् ।
सत्य साई सेवा संगठन, नेपालले सामुदायिक खानेपानी योजना शुरु गरेको हो । सो योजनाको सत्य साई साधना भवनको शिलान्यास सत्य साई अन्तर्राष्ट्रिय संगठनका अध्यक्ष नरेन्द्रनाथ रेड्डी र श्रीमती हाइमा रेड्डीले संयुक्तरुपमा बुधबार शिलान्यास गर्नुभएको हो । शिलान्यास कार्यक्रममा वेद पाठ र सत्य साई साधना गरिएको थियो ।
कूल ६१ घर चेपाङको मात्र बस्ती रहेको सो योजना निर्माणमा कति खर्च लाग्ने भन्ने खुलाइएको छैन ।
“गाउँमा खानेपानी समस्या थियो । जिल्लामा समेत गुनासो पुगेको थियो । जिल्ला समन्वय समिति र जिल्ला खानेपानी तथा सरसफाइ डिभिजन कार्यालयमा समेत चेपाङले ज्ञापनपत्र बुझाएका थिए तर सुनुवाइ भएको थिएन ।
यसबारेमा समाचार आएपछि सोही आधारमा खानेपानी योजनाका लागि सहयोग गरिएको सत्य साई सेवा संगठन, नेपालका अध्यक्ष अमरबहादुर कार्कीले जानकारी दिए ।
हेलिकप्टरमा आएका सत्य साई अन्तर्राष्ट्रिय संगठनका अध्यक्ष नरेन्द्रनाथ रेड्डीसहितका अतिथिलाई चेपाङले आफैँले पञ्चैबाजा बजाएर स्वागत गरेका थिए ।
सो अवसरमा चेपाङ समुदायमा निःशुल्क स्वास्थ्य शिविर र नारायण सेवा (सामुदायिक भोजन) आयोजना गरिएको थियो ।
स्वास्थ्य शिविरमा बालरोग, स्त्रीरोग, दन्त, आँखा, साधारण चेकजाँच र विशेषज्ञ डाक्टरबाट परामर्श सेवा उपलब्ध थियो । गाउँघरमै शिविर सञ्चालन भएकाले बालबालिका, विद्यार्थी, वृद्धवृद्धा, वयस्क महिला तथा पुरुष गरी ७०० भन्दा बढीले स्वास्थ्य परीक्षण गराएको वडा सदस्य संगीता चेपाङले बताए ।
