४ असोज, काठमाडौं । स्पेनिस क्लब रियल मड्रिडले च्याम्पियन्स लिगमा विजयी सुरुवात गरेको छ ।
बुधबार राति सान्टियागो बर्नेबेउमा भएको समूह जी को खेलमा रियल मड्रिडले इटालियन क्लब रोमालाई ३–० गोलले पराजित गरेको हो । घरेलु मैदानमा रियल मड्रिडलाई जित दिलाउन इस्को, ग्यारेथ बेल र मरियानो डेइजले गोल गरे ।
खेलमा ४५ औं मिनेटमा इस्कोले गोल गर्दै रियल मड्रिडलाई अग्रता दिलाएका थिए । पहिलो हाफसम्म १–० गोलले अघि रहेको रियल मड्रिडले दोस्रो हाफमा २ गोल गर्दा रोमाले भने गोल गर्न सकेन ।
खेलको ५८ औं मिनेटमा बेलले गोल गर्दै रियल मड्रिडलाई दोब्बर अग्रता दिलाएका थिए । खेलको अन्तिम समयमा डेइजले गोल गरेपछि रियल मड्रिले रोमालाई ३–० गोलले पराजित गरेको हो ।
त्यस्तै, बुधबार राति नै भएको यही समूहको अर्को खेलमा भिक्टोरिया प्लेजन र सीएसकेए मस्को २–२ गोलको बराबरी रोकिएका छन् ।
