१३ साउन, विराटनगर । विराटनगरस्थित मोरङ कारागारमा क्षमता भन्दा झण्डै ३ गुणा बढी कैदीबन्दी राखिएका छन् । जसले गर्दा उनीहरुलाई खान, बस्न, सुत्न हिँडडुल गर्नदेखि शौचालय जानसमेत समस्या भएको छ ।
तीन विघा क्षेत्रफलमा फैलिएको कारागारको कुल क्षमता ३ सय जना भए पनि हाल ८ सय ६४ जना राखिएको छ ।
कारागारका निमित्त प्रमुख कल्पना श्रेष्ठले कारागारमा ठाँउ अभाव हुँदा कारागार कैदीबन्दीले खचाखच भरिन पुगेको बताइन् । ‘ठाउँ अभावमा एउटै कोठामा ३० देखि ४० जना राख्नुपर्ने बाध्यता छ, सुत्न, बस्न, हिँडडुलदेखि शौचालय जान पनि पालो कुरेर बस्र्नुपर्ने अवस्था छ’ उनले भनिन् ।
एकै ठाउँमा धेरै समय बस्नुपर्ने भएकाले कैदी बन्दीमा विभिन्न स्वास्थ्य समस्या देखिने गरेको छ । सरकारले बजेट विनियोजन कम गर्ने र बिरामी कैदीबन्दी यहाँ ल्याएर राखिदिँदा उपचारमा समस्या भएको श्रेष्ठले गुनासो गरिन् ।
कारागारका चौकीदार नविन राईले दिनहुँ कैदीबन्दीको संख्य थपिने क्रमसगै सुत्न बस्ने व्यवस्थापनमा सबै भन्दा बढी सकस भएको बताए ।
‘कोचिएर बस्नुपर्दा कैदीबन्दीहरू पटकपटक बिरामी पर्दै आएका छन,’ उनले भने, ‘अपराध गर्नेलाई सुधारका लागि कारागार बसाइ सुध्रिने किसिमको हुनुपर्छ तर यहाँ क्षमताभन्दा बढी संख्या भएकाले समस्या भएको हो ।’