चलचित्र ‘म यस्तो गीत गाउँछु २’को रिलिज मिति परिवर्तन गर्दै ट्रेलर सार्वजनिक गरिएको छ । फागुण २३ गतेबाट रिलिज हुने भनिएको यो चलचित्र अब एक साता पछि सरेको छ । यो चलचित्र अब फागुणको ३० गतेबाट रिलिज हुनेछ । सुदर्शन थापाको निर्माण तथा निर्देशनमा बनेको चलचित्रको ट्रेलरमा संगीत र प्रेमलाई जोडिएको छ ।
चलचित्रको ट्रेलरमा नायक पल शाह र नायिका पूजा शर्माको प्रेम, रोमान्स र विछोडलाई प्रस्तुत गरिएको छ । चलचित्रमा हरिहर शर्मा, दिनेश डीसी, गणेश गिरीको पनि मुख्य भूमिका छ ।
चलचित्रको ट्रेलरमा पल शाहलाई सुपरस्टार गायकको रुपमा देखाइएको छ । साथमा, नायिका पूजा शर्मालाई राइजिङ स्टारको रुपमा प्रस्तुत गरिएको छ । पल र पूजाको भेट, रोमान्स, प्रेम, करिअर र विछोडको वरिपरी यो चलचित्रको ट्रेलर प्रस्तुत गरिएको छ ।
पूजा शर्मा र सुदर्शन थापाको लगानी रहेको यो चलचित्रमा जन्मजय र साम्पाङ राई सह–निर्माताको रुपमा छन् । चलचित्रमा सौरभ लामाको छायांकन, रामजी लामिछानेको कोरियोग्राफी, सुदर्शन थापाको कथा, शिवम् अधिकारी र दिनेश न्यौपानेको पटकथा, अर्जुन पोखरेलको संगीत छ ।
निर्देशक तथा निर्माता सुदर्शन थापाले चलचित्रको प्रदर्शन मिति वितरकसँग सल्लाहा गरेरै पछि सारिएको जानकारी दिए ।
