२८ भदौ, काठमाडौं । राष्ट्रिय क्रिकेट टिमका सदस्य ललितसिंह भण्डारी मोटरसाइकल दुर्घटनामा परेका छन् । कञ्चनपुरमा ट्रकले उनी सवार मोटरसाइकललाई ठक्कर दिएको हो ।
जिल्ला प्रहरी कार्यालय, कञ्चनपुरका अनुसार धनगढीबाट महेन्द्रनगरतर्फ जाँदै गरेको से १ ख १३२४ नम्बरको मिनी ट्रकले विपरित दिशाबाट आउँदै गरेको भण्डारी सवार म २ प ४७०५ नम्बरको मोटरसाइकललाई ठक्कर दिएको थियो । घटनामा मोटरसाइकलको पछाडि बस्ने करण ठगुन्ना पनि घाइते छन् ।
दुवै जनाको धनगढीको माया मेट्रो अस्पतालमा उपचार भइरहेको कञ्चनपुरका डीएसपी अमर थापाले बताए । भण्डारीको टाउको, कम्मर र हातमा चोट रहेको थापाले अनलाइनखबरलाई जनाए ।
चिकित्सकलाई उदृत गर्दै उनले बताए अनुसार भण्डारीको स्वास्थ्य अवस्था मध्यम छ ।
ट्रकलाई प्रहरीले नियन्त्रणमा लिएको छ भने चालक फरार छन् ।
