१७ चैत, काठमाडौं । लियोनल मेस्सीलाई अहिले पनि बार्सिलोनाले सम्झिरहेको छ ।
कप्तान सर्जियो बुस्केटले पनि लियोनल मेस्सी बार्सिलोना फर्किने अवस्थामा स्वागत गर्न आतूर रहेको बताए । साथै कप्तानीको जिम्मेबारी पनि तुरुन्तै सुम्पिन तयार रहेको प्रष्ट पारेका छन् ।
यो सिजनको सुरुवातमा मेस्सी बार्सिलोना छाड्न बाध्य पारिएका थिए । क्लबले वित्तीय अनुशासनको नियमका अनुसार नयाँ सम्झौता गर्न असफल भएको जनाएको थियो । त्यसपछि उनी फ्रान्सेली च्याम्पियन पेरिस सेन्ट जर्मेइन (पीएपजी)मा अनुबन्ध भएका थिए ।
‘वास्तवमै मैले उनलाई फिल्ड भित्र र बाहिर पनि मिस गरिरहेको छु । उनले जे गरे अरु कसैले गर्न सकेका छैनन् । उनले निकै ठूलो परिवर्तन गरे । यतिधेरै समय सँगै हुँदा उनलाई सम्झिनु सामान्य कुरा हो । मेरो विचारमा उनले पनि मलाई सम्झिरहेका छन्,’ बुस्केटले भनेका छन्, ‘उनको वहिर्गमन हाम्रो लागि अप्रत्यासित थियो । उनले शहरलाई परिवर्तन गरे, टिमलाई परिवर्तन गरे र शैली परिवर्तन गरे ।
बुस्केटले थपे, ‘तपाईंले जित्न सक्नुभएन भने खुसी पाउनुहुन्न । म उनलाई शुभकामना दिन चाहन्छु र उनी फर्केर नोउ क्याम्प आउन भन्ने चाहन्छु । मलाई थाहा छ यो कठिन कुरा हो, उनले अर्को क्लबमा सम्झौता गरेका छन् ।
प्रतिक्रिया 4