काठमाडौं । इसेवा मनी ट्रान्सफर र बेलायतबाट विश्वका ४० भन्दा बढी मुलुकमा रेमिट्यान्स सेवा प्रदान गर्दै आएको टेङ्गोपेबीच रेमिट्यान्स भुक्तानीसम्बन्धी सम्झौता भएको छ । सम्झौता पत्रमा इसेवा मनी ट्रान्सफरका सीईओ अजेस कोइराला र टेङ्गोपेका निर्देशक बसिर संगर्वालले हस्ताक्षर गरेका छन् ।
सम्झौतासँगै बेलायतमा रहेका नेपालीहरुले नेपालमा पैसा पठाउँदा टेङ्गोपेको मोबाइल एप तथा वेबसाइटबाट अनलाइन सेवा प्रयोग गर्दै इसेवा मनी ट्रान्सफरमार्फत रेमिट्यान्स पठाउन सकिनेछ । टेङ्गो पेबाट पैसा पठाउँदा सुरुको ३ महिनासम्म कुनै शुल्क लाग्नेछैन ।
विदेशबाट टेङ्गोपे मार्फत अनलाइन पठाएको रेमिट्यान्स नेपालभर रहेका १८ हजार बढी भुक्तानी केन्द्रबाट समेत तुरुन्तै प्राप्त गर्न सकिनेछ । त्यस्तै पाउने व्यक्तिले पठाएको रेमिट्यान्स भुक्तानी केन्द्रमा नगई सोझै इसेवा वालेटमा प्राप्त गरेर अतिरिक्त रु. ७७ बोनस रकम समेत प्राप्त गर्न सकिनेछ ।
इसेवा मनी ट्रान्सफरका सीईओ कोइरालाले बेलायतमा नेपालीहरुको प्रभुत्व ठूलो रहेको र यस सम्झौताले नेपालमा रेमिट्यान्स पठाउन एक नयाँ माध्यम थपिएको बताए ।
टेङ्गोपे विश्वका ४० भन्दा बढी देशमा रेमिट्यान्स सेवा प्रदान गर्दै आएको बेलायतको फाइनेन्सिअल कन्डक्ट अथोरिटीबाट इजाजत प्राप्त डिजिटल भुक्तानी सेवा प्रदायक हो । यसले सरल र सस्तो दरमा आफ्ना ग्राहकहरुलाई क्यास पिक अप, तत्काल खाता क्रेडिट, मोबाइल वालेट क्रेडिट लगायतका सुविधा प्रदान गर्दै आएको छ ।
प्रतिक्रिया 4