फिल्म ‘जम्प’को ट्रेलर : जब धावकलाई समय परिवर्तन गर्ने क्षमता प्राप्त हुन्छ

काठमाडौं । आशुतोषध्वज कार्कीको लेखन तथा निर्देशनमा बनेको फिल्म ‘जम्प’को ट्रेलर सार्वजनिक भएको छ । दुई मिनेट १२ सेकेन्ड लामो ट्रेलरले फिल्मको कथावस्तु ‘सस्पेन्स’ रहेको संकेत गर्छ ।

मनोवैज्ञानिक थ्रिलर जनरामा बनेको यो फिल्म मंसिर २९ गते प्रदर्शन हुँदैछ । कथाअनुसार राष्ट्रिय धावक बनेका मुख्यपात्रलाई समय परिवर्तन गर्ने अलौकिक क्षमता प्राप्त हुन्छ । विगतमा दबाएर राखिएका अनुभूतिले उसलाई पिरोल्न थाल्छन् । यससँगै आएका घटनाक्रम वरपर फिल्मले फन्को मार्छ ।

फिल्ममा सरोज श्रेष्ठ, सन्देश शाक्य, विनिता थापा, मन्जिल जिसी, सगुन तामाङ, रोशनी स्याङ्ग्बो, शंकर महर्जन र प्रवल कँडेलको अभिनय छ । फिल्म फेस्टिभलमा दरिलो उपस्थिति जनाएको फिल्मले दर्शकलाई छुट्टै स्वाद दिने विश्वास रहेको लेखक तथा निर्देशक कार्कीले बताए ।