एक सातामै स्काउटको सम्बन्धमा उथलपुथल, सलमानले मागे एक–एक हिसाब

काठमाडौं । बिग बोसको घरमा सम्बन्ध बन्न जति समय लाग्दैन, टुट्न पनि त्यति नै बेर लाग्दैन । हिजोसम्म एउटै समूहमा देखिएका प्रतिस्पर्धी आज एकअर्काविरुद्ध उभिन सक्छन् ।

मित्रता, प्रेम र विश्वासको यही उतारचढावबीच यसपटक ‘वीकेन्डका वार’मा कार्यक्रम प्रस्तोता सलमान खानको निशानामा परे, गेमर स्काउट ओपी ।

‘बिग बोस २०’ को पछिल्लो ‘वीकेन्डका वार’मा सलमानले स्काउटलाई उनको बदलिँदो सम्बन्ध र व्यवहारलाई लिएर प्रश्न गरे ।

एक सातामै उनले आफ्नो वास्तविकता देखाएको टिप्पणी गर्दै सलमानले कसैप्रति पनि इमानदार हुन नसकेको आरोप लगाए ।

सलमानले भने, ‘एक हप्तामै तपाईंले देखाइदिनुभयो कि तपाईं कसैप्रति पनि वफादार हुनुहुन्न ।’

उनले स्काउटले आफूले दिदी मानेकी आम्रपालीलाई गर्लफ्रेन्ड काश्वीका अगाडि साथ दिन नसकेको र भाइजस्तो साथी यङको पक्षमा पनि उभिन नसकेको बताए ।

सलमानले स्काउटको सम्बन्धमा आएको परिवर्तनलाई पनि औँल्याए ।

पहिले आफूलाई मन नपर्ने गुल्लूसँग नजिकिएको र पछि त्यही समूहकी युवतीलाई दिदी भन्न थालेको भन्दै उनले स्काउटको व्यवहारमाथि प्रश्न उठाए ।

गर्लफ्रेन्ड र साथीबीच अल्झिएको सम्बन्ध

स्काउट र उनकी गर्लफ्रेन्ड काश्वीबीचको सम्बन्धलाई लिएर पनि सलमानले खुलेर कुरा गरे ।

काश्वी घरमा आएपछि लभ गिलसँग स्काउटको सम्बन्धलाई लिएर विवाद चर्किएको थियो । काश्वीले लभसँग दूरी बनाउन भनेपछि स्काउट अप्ठ्यारोमा परेको देखिन्थ्यो ।

सलमानले काश्वीको असन्तुष्टिलाई स्पष्ट रूपमा सम्बोधन गर्न नसकेको भन्दै स्काउटलाई प्रश्न गरे। काश्वीलाई कुनै कुरा चित्त नबुझेको भए त्यसबारे स्पष्ट कुरा गर्नुपर्ने उनको भनाइ थियो ।

स्काउटले आफूले कसरी परिस्थिति सम्हाल्ने भन्ने बुझ्न नसकेको बताए । उनले धेरैसँग सल्लाह लिएको र सम्बन्धका पछिल्ला ५० दिन देखावटी नभएको पनि दावी गरे ।

तर सलमानले उनको व्यवहारमा देखिएको दोहोरोपनलाई स्वीकार गर्न सकेनन् ।

यदि काश्वीसँगको सम्बन्धलाई प्राथमिकता दिएर लभसँग दूरी बनाउने निर्णय गरेको भए त्यसमा स्पष्ट रहनुपर्ने उनको भनाइ थियो ।

लभ र यङलाई पनि सलमानको प्रश्न

सलमानले लभ गिलसँग पनि कुरा गरे । स्काउटको गर्लफ्रेन्ड भएको थाहा हुँदाहुँदै सम्बन्धलाई लिएर किन यति धेरै भावनात्मक भएको भन्दै उनले लभलाई प्रश्न गरे ।

त्यस्तै, यङलाई अब आफ्नै खेल खेल्न र अरूको सम्बन्धमा अल्झिन छाड्न सुझाव दिए ।

स्काउटसँगको मित्रतामा आएको दरार र गुल्लूसँग बढेको निकटतालाई लिएर यङले पनि असन्तुष्टि जनाएका थिए ।

माहीलाई पनि सलमानले छाडेनन्

यसपटक सलमानको प्रश्न स्काउटमा मात्र सीमित रहेन । उनले माहीलाई पनि घरभित्रको उनको भूमिकालाई लिएर प्रश्न गरे ।

बिग बोसमा आउन लामो समयदेखि प्रयास गरिरहेकी माहीबाट दर्शक र निर्माण पक्षले धेरै अपेक्षा गरेको तर घरभित्र उनको गतिविधि अपेक्षाअनुसार नदेखिएको सलमानको टिप्पणी थियो ।

उनले माहीलाई अरूका विषयमा गफ गर्नेभन्दा आफ्नो खेलमा ध्यान दिन सुझाव दिए ।