बाम बुद्धिजिवी संग्रौला गगनको चुनाव प्रचारमा

२ कात्तिक, काठमाडौं। काँग्रेस युवा नेता एवं काठमाडौं क्षेत्र नम्बर ४ का उमेद्वार गगन थापा चाहविल क्षेत्रमा चुनावी अभियानमा पुग्दा बाम बुद्धिजिवी खगेन्द्र संग्रौलाले हार्दिकतापूर्वक स्वागत गर्नुभयो।

संग्रौलाले थापालाई घरमा लगेर टीका लगाई विजयको शुभकामना दिनुभयो । घरमा सकिएको अबिर लिन संग्रौलाकी श्रीमती जमुना गुरुङले संग्रौलालाई पसलमा पठाउनुभएको थियो । आफूले ल्याएको अबिरले श्रीमतीले थापालाई टीका लगाइदिएपछि संग्रौला दम्पतीले थापालाई सगुनको रुपमा दही खुवाएर जीतको आशिर्वाद दिनुभएको थियो । साथमा जमुना गुरुङ संग्रौलाले थापालाई बुद्धिमान बिबेकशील र बिनम्र हुन शुभकामना दिनुभयो । गगन थापालाई छोरा भनेर सम्वोधन गर्दै उहाँले काँग्रेस उमेद्वार थापालाई देशकै छोरा हुन शुभकामना समेत दिनुभयो ।

घरमा थापालाई विजयको शुभकामना दिनुभएका संग्रौला दम्पती त्यसपछि टोलमा गगन थापासँग चुनावी प्रचारमा समेत जानुभएको थियो ।

थापाले शनिवार बुलबुले क्षेत्रमा समेत घरदैलो गरेको काँग्रेस क्षेत्र नम्बर ४ का सभापति न्हुच्छेनारायण श्रेष्ठले जानकारी दिनुभयो ।

स्मरण रहोस् विगत ०५१ को संसदीय चुनावमा पनि वाम बुद्धिजिवी संग्रौलाले एमाले नेतृ विद्या भण्डारीको साटो कांग्रेसका दमननाथ ढुंगानाको समर्थन गर्नुभएको थियो ।