५ मंसिर, काठमाडौं । १८ औं सार्क शिखर सम्मेलन आउन अब एक हप्ता पनि बाँकी छैन । तर, सार्क सम्मेलनलाई लक्षित गरेर थालिएको काठमाडौं उपत्यकाको सरसफाइ र पुनर्निर्माणको काम अलपत्र छ । हतारको काम लतार भन्ने नेपाली उखानसँग ठ्याक्कै मेल खाएको छ सरकारको गतिविधिले ।
पल्टनियाँ आइसके खाना दाना तयार छैन भन्ने आहानजस्तै सार्क सम्मेलनका पाहुनाहरु काठमाडौं आउने बेलासम्म निर्माण कार्य असरल्लै छ ।
छिटो काम सक्ने नाममा गरिएका काम गुणस्तरीय छैनन् । टालटुले काम गरेर करोडौं बजेट झ्वाम पारिएको छ । हतार-हतारमा मन्त्रिपरिषद बैठकबाट निर्णय गरेर निकासा गरिएको बजेट सदुपयोग भन्दा बढी दुरुपयोग भएको छ ।
सार्क सम्मेलनमा सहभागी हुने पाहुनाहरु अवतरण गर्ने त्रिभुवन अन्तराष्ट्रिय विमानस्थलदेखि तीनकुने, मीनभवन, नयाँबानेश्वर, बबरमहलसम्मको सडकपेटी पटक-पटक भत्काइएको छ । भत्काइएका स्थान मर्मत नगरी अलपत्र छाडिदिँदा काठमाडौं कुरुप भएको छ ।
तीनकुनेमा पार्क बनाउने भनिए पनि काम सकिएन । अहिले तीनकुनेको खाली जग्गालाई वरिपरि निलो जस्ताको बार लगाएर छोपिएको छ । तीनकुनेमा पार्क बनाउन एक करोड रुपैयाँ निकासा भएको थियो ।
सानादेखि ठूला दलका नेताहरु आवत-जावत गर्ने संविधानसभा भवन किनाराको सडकपेटीमा यत्रतत्र छरिएका ढुंगा देख्दा राजधानी शहर हो कि ढुंगेबगर, छुट्टाउन गाह्रो पर्छ । सडक फराकिलो बनाउने नाममा कतै-कतै सर्वसाधारण हिँड्ने सडकपेटी समेत भत्काइएको छ भने रुख रोप्न भनेर खनिएका खाल्डासमेत पुरिएका छैनन् ।
सडक किनारमा सार्क सदस्य राष्ट्रका झण्डा राख्नका लागि ठड्याउने भनिएका पोल पनि सडक किनारमै अलपत्र पारेर थुपारिएको छ । कतिपय स्थानमा सडक पीच गर्न नभ्याएर अलकत्राको कालो झोल छर्केर त्यतिकै छाडिएको छ । श्रीधर पौडेलले क्यामरामा कैद गरेका तस्वीरहरु हेर्नुस्