चलचित्र ‘रइस’मा बलिउड नायक साहरुख खानसँग काम गरेकी पाकिस्तानी नायिका माहिरा खानले भारतमा पाकिस्तानका कलाकारलाई काम गर्नबाट प्रतिबन्ध लगाएपछि आफू निकै डराएको बताएकी छिन् ।
हालै एक पाकिस्तानी मिडियासँग कुरा गर्दै उनले सो समयमा आफूले के गर्ने र नगर्ने निर्णय लिन नसकेको पनि बताएकी छिन् । उनले, आफूलाई सो समयमा थुप्रै वेव सिरिजबाट अफर आएको तर डरका कारण काम नगरेको पनि खुलासा गरेकी हुन् ।
उनले भनेकी छिन्–‘मलाई सो समयमा थुप्रै वेव सिरिजबाट अफर आएको थियो । तर, म निकै डराएकी थिएँ । के गर्ने भन्ने बिषयमा मैले केही पनि निर्णय लिन सकेकी थिइनँ ।’
माहिराले मानिसहरुले के भन्छन् भनेर आफू नडराएको पनि बताएकी छिन् । तर, केही राम्रा कथाहरुबाट अफर आएपनि आफूले स्विकार गर्न नसकेको उनले बताएकी छिन् ।
तर, अब भने आफूलाई कसैले पनि प्रभावित बनाउन नसक्ने उनको भनाई छ । माहिराले चाडै नै भारतीय मेकरसँग सहकार्य हुने आशा पनि व्यक्त गरेकी छिन् । सन् २०१६ मा उरीमा आतंकवादी हमला भएपछि पाकिस्तानी कलाकारलाई भारतीय चलचित्र उद्योगमा काम गर्न प्रतिबन्ध लगाइएको थियो ।
तर, सन् २०१९ मा पुलवामा हमला हुँदा ४० जना सीआरपीएफ जवानको ज्यान गएको थियो । यसपछि भने इन्डिया सिने वर्कर्स एसोसियसनले पाकिस्तानी कलाकारलाई पूर्ण रुपमा प्रतिबन्ध लगाएको थियो ।
