बिदेश भ्रमण मात्रै होइन, गाउँघर चारेर देखाउ
गरीबका झुपडीमा राशन पानी झारेर देखाउ।
श्रोत साधन पनि कर्मचारी र नेताकै पेवा भो
सक्छौ भने जनताको आँगनमा सारेर देखाउ।
दुई छाक टार्न धौधौ परिरा’को छ बस्तीहरुमा
पाँचतारे होटलको खर्च कुनाकाप्चामा पारेर देखाउ।
युवाजति लखेटेर अरबमा शरणार्थी बनायो
बिदेश जान नदिइ आफ्नै देशमै नारेर देखाउ।
जलश्रोत र जडिबुटी बिनाकाम नै खेर गइरा’छ
सदुपयोग गरी देशलाई बिकासमा, खारेर देखाउ।
सुस्ता, कालापानी, लिपुलेक दुश्मनले धावा बोले
चारैतिर सिमानामा काँडेतारले बारेर देखाउ।
अनुदान र भिक्षा मागेर कति दिन चलाउँछौ
आफ्नै बलबुतामा राष्ट्रको खर्च टारेर देखाउ।
–शंकर सुबेदी
मोरङ उर्लाबारी