जर्मनीको बर्लिनमा चलिरहेको कन्जुमर इलेक्ट्रोनिक्स शो आइएफएका क्रममा चिनिया इलेक्ट्रोनिक्स कम्पनी लेनोभोले तिनवटा क्यामरा भएको स्मार्टफोन सार्वजनिक गरेको छ ।
भाइव एस वान नामको उक्त स्मार्टफोन सेल्फीका पारखीहरुको पहिलो रोजाइमा पर्ने पक्का छ । यो स्मार्टफोन विश्वको यस्तो पहिलो स्मार्टफोन बनेको छ, जसमा दुइवटा फ्रन्ट क्यामरा रहेको छ । यो क्यामराको मूल्य २९९ डलर तोकिएको छ ।
लेनोभो भाइव एस वान स्मार्टफोनमा रहेका दुइ सेल्फी क्यामरा मध्ये एउटा ८ मेगापिक्सेल तथा अर्को २ मेगापिक्सेलको रहेको छ । मुख्य रियर क्यामरा भने १३ मेगापिक्सेलको छ जसमा डुअल टोन फ्लास प्रविधि रहेको छ । यो स्मार्टफोन पर्ल व्हाइट तथा मिडनाइट ब्लु गरी दुइ रंगमा उपलब्ध रहेको छ ।
के के छन् फिचर्स ?
लेनोभोको यो अनौठो स्मार्टफोनमा ५ इन्चको फूल एचडी स्क्रिन रहेको छ । एन्ड्रोइड ५.० ललिपप अपरेटिंग सिस्टमबाट चल्ने यो स्मार्टफोनमा ६४ बिट अक्टाकोर प्रोसेसर रहेको छ । त्यस्तै ३ गिगाबाइट र्याम, ३२ गिगाबाइट इन्टर्नल मेमोरी तथा १२८ गिगाबाइट मेमोरी कार्ड सपोर्ट रहेको छ । यो स्मार्टफोनमा फोर जी कनेक्टिभिटी लगायतका फिसर्च समेत रहेका छन् ।
इलेक्ट्रोनिक्स शो का क्रममा लेनोभोले भाइब वानका अलावा अन्य दुइ स्मार्टफोन पनि पेश गरेको छ । त्यसमा भाइब पि वान तथा भाइब पि वान एम रहेका छन् । यी दुबै स्मार्टफोनमा ५ हजार मिलिएम्पियर आवर तथा ४ हजार मिलिएम्पियर आवर क्षमताका ब्याट्री प्रयोग गरिएको छ जुन निकै छिटो चार्ज हुने प्रविधिले युक्त छन् ।
