‘नाई नभन्नु ल’ सिरिज अन्तर्गत चौथो श्रृङ्खलाले काठमाडौंमा धुम मच्चाई रहँदा यस श्रृङ्खलाकी पहिलो नायिका ऋचा सिंह ठकुरीले आजसम्म फिल्म हेरेकी छैनन् ।
‘म त अहिले चितवनमा छु । फिल्म हेर्न भ्याएको छैन । काठमाडौ आएपछि हेर्छु ।’ अनलाइनखबरसँग कुरा गर्दै ऋचाले भनिन् ।
तर, फिल्मको वारेमा निकै चासो राख्ने गरेकी छिन् । पहिलो श्रृङ्खलामा आफूले अभिनय गरेकाले हरेक सिरिजमा आफैँले अभिनय गरे जस्तो लाग्छ उनलाई । फिल्म हेर्न नपाएपनि फिल्मको विषयमा निर्देशक विकास आचार्यसंग कुरा गरिरहन्छिन् ।
‘मलाई विकास दाई आफैंले फोन गरेर भन्नु हुन्छ नानु आज यस्तो भयो नि ।’ उनी फिल्मले कति कमायो । कँहा कस्तो ब्यापार गर्यो लगायतका विषयमा भने अपडेट छिन् ।
विवाहपछि फिल्मवाट टाढा
कुनै समयकी ब्यस्त नायिकाको रुपमा चिनिन्थिन् ऋचा । डेढ दर्जन बढी फिल्ममा अभिनय गरेपनि अहिले उनी गुमनाम जस्तै छिन् । ‘हो विवाह गरेपछि मैले अभिनय गरेको छैन । घर परिवारसँग रमाउदै छु ।’ उनले भनिन् ।
अभिनयमा सक्रिय हुँदा घर परिवारका सदस्यसंग टाढिएकाले पनि परिवारकै सदस्यसंग बस्न मन थियो उनलाई । विवाहपछि त श्रीमानका नातेदारसंग समेत जोडिने भएकाले अझै धेरै समय आवश्यकता महसुस् गरिन् । फिल्मलाई चटक्कै छाडिदिईन् ।
विवाह गर्नु केही अघि मोबाईल नम्बर परिवर्तन गरेकी ऋचाले धेरैलाई नयाँ नम्बर दिएकै छैनन् । त्यसकारण पनि फिल्म उद्योगसंग उनको सम्बन्ध बिच्छेद भएको छ ।
विवाहपछि पनि उनी श्रीमानसँग रमाउन भने पाएकी छैनन् । उनको श्रीमान अष्टे्रलियामा बस्छन् भने उनी माइतीघर चितवनमा ।
विवाह लगत्तै उनका श्रीमानले उनलाई पनि अष्ट्रेलिया जाऔ नभनेका होईनन् । तर, उनी मान्दिनन् । ‘मलाई विदेश पटक्कै मन पर्दैन म त यहि बस्छु ।’ उनले श्रीमानसँग पनि यहि शब्द दोहोर्याउने गरेकी छिन् । सकेसम्म श्रीमानलाई नेपालमै बोलाउने योजना छ उनको ।
फिल्म हेर्दै सपिङ
अहिले उनको खास काम छैन । नारायणघाट बजारमा सपिङ गरेर समय बिताउछु भन्ने ऋचाले हेर्न मन लागेको तर, हेर्न नपाएको फिल्म हेर्ने गरेकी छिन् । ‘कति फिल्म हेर्न मन लागेर पनि हेर्न पाएको थिईन् । अहिले त्यहि फिल्म हेर्दैछु ।’ उनले भनिन् ।
अंग्रेजी, हिन्दी र केही नेपाली फिल्म जम्मा पारेकी ऋचा फुर्सदमा ति फिल्म हेर्छिन् । आफ्नै फिल्म दुई पटक भन्दा बढी हेर्ने गरेकी छैनन् ।