११ वैशाख, काठमाडौं । प्रतिवन्धविरुद्धको अपील फिफाले अस्वीकार गरेपछि गणेश थापा अदालत जाने भएका छन् ।
थापाले आफ्नो १० वर्षे प्रतिवन्धविरुद्ध थापाले गरेको अपिल फिफाको अपिल कमिटीले अस्वीकार गरेको थियो ।
थापाले अब आफू अदालत जाने बताएका छन् । शनिबार साँझ विज्ञप्ति जारी गर्दै थापाले कोर्ट अफ अर्बिटेशन फर स्पोटर्स जाने बताएका छन् ।
आफूले अपिल कमिटीको पत्र शुक्रबार पाएको भन्दै थापाले भनेका छन्, ‘त्यो निर्णय साच्चै निराशाजनक छ ।’
भ्रष्टाचारको आरोपमा फिफाले गत कात्तिक २९ मा एन्फाका तत्कालीन अध्यक्ष थापामाथि फुटबलसम्वन्धी कुनै पनि गतिविधिमा भाग लिन नपाउने गरी १० वर्षको प्रतिवन्ध लगाएको थियो । साथै झण्डै २१ लाख जरिवाना गरेको थियो ।
फिफाको प्रतिवन्धपछि एन्फाबाट बाहिरिएका थापाले त्यसविरुद्ध अपिल गरेका थिए । थापाको अपिल खारेज गरिएको फिफाको वेबसाइटमा उल्लेख छ ।
