सम्बन्ध नभएको भन्दा भएकै राम्रो

जुट्दा खेरि फक्रिदिन्छ

रङ्गीचङ्गी फूलहरू

तर कहिले काहीँ

फुट्दा खेरि झरिदिन्छ

ओइलिएका फूलहरू

हेर यो संसारका सन्तानहरू

जुटाउने पनि छन् फुटाउने पनि छन्

नजुटिकन सम्बन्धै हुँदैन

जसरी एक हातले ताली बज्दैन

एक्लै हुँदा कसरी भौतारिन्छन्

एकोहोरिएका मानिसहरु

नबिग्रीकन थाहा हुदैन सम्बन्ध

नटुटिकन थाहा हुँदैन

कसको कहाँ कति

कोमल दिलको दु:खाइ

सम्बन्धमा सम र बन्ध हुनुपर्छ

मिलेको गाँसिएको

कुनै वकालत नै गर्न नपर्ने

विल्कुलै अहम रहित

तर असमान र खुल्ला भएमा

अहँ मिल्दैन बाँधिदैन

क्रोधले भटकाइरहन्छ बुद्धि

विगारिदिन सक्छ छुटाइदिन सक्छ

सम्बन्ध बाँधिन्जेललाई मात्र हो

फुक्न नदिने हो साँचो भावना

कसैको सम्बन्ध मीठो

हाँसो, सुख र खुशी भरिएको

परन्तु कसैको तीतो-अमिलो

आँसु, दु:ख र विरह छरिएको

रफु भर्दा पनि दुरूस्त नदेखिने

कतै टालिएको कतै उध्रिएको