२६ कात्तिक, काठमाडौं । मधेसी मोर्चाले बिहीबार व्यवस्थापिका संसद बैठक बहिस्कार गर्ने तयारी गरेको छ । साथै कान्तिक मसान्तभित्र संविधान संशोधन विधेयक दर्ता नभए मंसिर १ गतेबाट संसद बैठक अवरुद्ध गर्ने मोर्चाको तयारी छ ।
संसदको बैठक विहान ११ बजे बोलाइएको छ । र, बैठकमा अख्तियार प्रमुख लोकमान सिंह कार्कीविरुद्ध दर्ता भएको महाअभियोग प्रस्तावमाथि छलफल हुनेछ ।
तर, मधेसी मोर्चाले भने लोकमानविरुद्धको महाअभियोगमा भाग नै नलिने र संसद बैठक बहिस्कार गर्ने तयारी गरेको छ । यसबारे निर्णय गर्न मधेसी मोर्चामा आवद्ध पार्टीहरुको संसदीय दलको बैठक बोलाइएको छ ।
मोर्चामा आवद्ध संघीय समाजवादी फोरमका सांसद शिवजी यादवले अनलाइनखबरसँग भने, आजको बैठकमा बोलेर बहिस्कार गर्ने सम्भावना छ ।’
एक नेताका अनुसार आज संसद बहिस्कार गर्नु अघि बोल्दा नै संविधान संशोधन विधेयक दर्ता नभए मंसिर १ गतेबाट संसद अवरुद्ध पार्ने चेतावनी दिइनेछ । मधेसी मोर्चाले महाअभियोगबारे आफ्नो धारणा सार्वजनिक गरेको छैन् ।
