२२ माघ, काठमाडौं । भारतीय सेनाका एक जवान मोहम्मद अब्बास आफ्नी आमाको शव लिएर १० फुट बर्फमा ३२ किलोमिटर पैदल हिँडेका छन् । २९ जनवरीमा सकीना बेगमको पठानकोटमा हृदयघातका कारण निधन भएको थियो ।
अब्बास पठानकोटमा भारतीय सेनामा तैनाथ थिए । र, आमा र भाइसँगै बस्दै आएका थिए ।
अघिल्लो दिन अब्बास आफ्नो आमाको शव लिएर कुपवाडा जिल्लाको चौकीबालमा पैतृक गाउँ करनाहका लागि हिडेका थिए । तर, भारी हिमपातका कारण बाँकी दुनियाँसँग सम्पर्क टुटेको छ ।
अब्बासले श्रीनगर पुगेपछि सरकारी हेलिकोप्टर घन्टौं प्रतिक्षा गरे । तर, खराब मौसमका कारण सबै फसे ।
अन्तिममा उनले आफ्ना भाइसँग मिलेर आमाको शव बोकेर श्रीनगरबाट पैदल हिडे ।
श्रीनगरबाट उनको गाउँ १२० किलोमिटर टाढा छ । अब्बासले हार मानेनन् र ३२ किलोमिटर दुबै भाइले आमाको शव बोकेर १० फुटसम्म बर्फमा यात्रा गरे ।
पछि उनका गाउँलेले सहयोग गरे र, अब्बासले आमाको शव घरमा पुर्याएका छन् ।
