११ चैत, काठमाडौं । प्रहरीले कर छलेर ल्याइएको इन्डोनेसियाको चुरोटसहित भारतीय नागरिक राहजित अब्दुल रज्जाकलाई पक्राउ गरेको छ ।
डेढ लाख मूल्यको ६० कार्टुन चुरोटसहित ५२ वर्षका उनलाई काठमाडौंको सुन्धाराबाट पक्राउ गरिएको महानगरी प्रहरी परिसर काठमाडौंले जानकारी दिएको छ ।
एक खिलीको ७० देखि १६० रुपैयाँसम्म पर्ने उक्त चुरोट रज्जाकले ठमेलबाट मुम्बई लैजान किनेको प्रहरीसँग बताएका छन् ।
उनले मुम्बईबाट कसैले ल्याउन भनेपछि ठमेलबाट मुम्बई लैजान खोजेको बयान दिएको काठमाडौं परिसर प्रमुख विश्वराज पोखरेलले बताएका छन् ।
काठमाडौं परिसरको स्वीप अपरेसन अभियानका क्रममा उनी पक्राउ परेका हुन् । उनलाई थप अनुसन्धानका लागि राजस्व अनुसन्धान विभागमा बुझाएको प्रहरीले जनाएको छ ।
