६ भदौ, काठमाडौं । कालीमाटी फलफूल तथा तरकारी बजार आज बुधबारदेखि खुलेको छ । तर, बजारमा पहिले जस्तो तरकारीको उपलब्धता भने छैन ।
तरकारी तथा फलफूलको आपूर्तिमा नियमितभन्दा केही कमी देखिएको तरकारी तथा फलफूल व्यवसायी महासंघका अध्यक्ष खुमप्रसाद घिमिरेले बताए ।
उनका अनुसार देशका विभिन्न क्षेत्रबाट कालीमाटी बजारमा दैनिक साढे ५ सय टनसम्म तरकारी तथा फलफूल भित्रिने गरेको थियो । आज भने करिब ४ सय टन मात्र आएको छ ।
सरकारी अनुगमनको विरोधमा उत्रिएका व्यवसायीले मंगलबार अबेर मात्र आन्दोलन फिर्ता लिएपछि तरकारी आपूर्तिमा कमी आएको उनको दाबी छ । ‘जहाँबाट तरकारी आउने हो, त्यहाँ ढिलो गरी सूचना पुग्दा कम तरकारी आपूर्ति भएको छ’, उनले भने ।
सोमबारको अनुगमनपछि व्यवसायीले कालीमाटी बजारमा तरकारीको बिक्री–वितरण ठप्प पारेका थिए । जसका कारण राजधानीका उपभोक्ता समेत मारमा परेका थिए ।
अनुगमनपछि मूल्य घट–बढ
सोमबारको अनुगमनपछि केही तरकारीको मूल्य भने घटेको छ । कालीमाटी फलफूल तथा तरकारी बजार विकास समितिका अनुसार भिण्डीको खुद्रा मुल्य मंगलबारभन्दा आज ६ रुपैयाँ घटेको छ ।
बुधबार भिण्डी प्रति केजी ५८ रुपैयाँ रहेकोमा बुधबार ५२ रुपैयाँमा झरेको छ । त्यस्तै च्याउको मूल्य १० रुपैयाँ घटेर १२५ रुपैयाँ प्रति केजी कायम भएको छ । कागतीको मूल्य १६५ बाट १५५, अनार १३५ बाट १२५ रुपैयाँ प्रति केजीमा बिक्री भइरहेको छ ।
कालीमाटी बजारमा ठूलो गोलभेडा, बन्दा, स्कसलगायतका केही तरकारीको मूल्य भने बढेको छ । ठूलो गोलभेडा बुधबार ५२ रुपैयाँ रहेकोमा आज ६ रुपैयाँ बढेर ५८ रुपैयाँ प्रति केजीमा बिक्री भइरहेको छ ।
त्यस्तै बन्दा ५२ बाट ६८, स्कुस ३८ बाट ४८, हरियो खुर्सानी ५८ बाट ७२, भेडे खुर्सानी १०५ रुपैयाँ प्रति केजीमा किनबेच भइरहेको समितिले जनाएको छ । धनियाँको भाउ भने प्रति केजी १ सय रुपैयाँभन्दा बढी वृद्धि भएको छ ।
मंगलबार धनियाँ प्रति केजी ४४५ रुपैयाँ रहेकोमा आज बढेर ५९५ रुपैयाँमा खरिद–बिक्री भइरहेको छ ।
