२५ असोज, काठमाडौं । विभागीय टिम नेपाल पुलिस क्लबले शहीद स्मारक ए डिभिजन लिग फुटबलमा विजयी सुरुवात गरेको छ ।
ललितपुरको सातदोबाटोस्थित एन्फा कम्प्लेक्सको खेलमैदानमा पुलिसले जावलाखेल युथ क्लबविरुद्ध १-० गोलअन्तरले पराजित गरेको हो । पुलिसको जितमा अजिज भण्डारीले गोल गरे ।
खेलको २०औं सन्तोष हेमरुनले प्रहार गरेको बल जावलाखेलका गोलकिपरले उत्कृष्ट बचाउ गरेपछि पुलिसले अग्रता बनाउनबाट चुकेको थियो । खेलको ३१औं मिनेटमा अजिज भण्डारीले गोल गर्दै विभागीय टिम पुलिसलाई अग्रता दिलाए । उनले तेज तामाङको पासमा गोल गरेका थिए ।
पहिलो हाफमा १-० गोलले अघि रहेको पुलिसले दोस्रो हाफमा पनि आफ्नो अग्रतालाई कायमै राख्न सक्यो । खेलको ६६ औं मिनेटमा जावलाखेलका राकेश हमालले कर्नरबाट आएको बललाई हेडबाट गोल गर्ने प्रयास गरेका थिए । तर, उनले प्रहार गरेको बल पुलिसका किपरले बचाएका थिए ।
खेलको ७०औं मिनेटमा सुमन लामाले प्रहार गरेको बल किपरले जावलाखेलका किपरले बचाएका थिए । खेलको ७५औं मिनेटमा प्रज्जल थापामगरले गोल गर्ने राम्रो अवसर पाएको थियो । तर, उनले प्रहार गरेको बल गोलकिपरले बचाएपछि जावलाखेलले बराबरी बनाउन बाट चुकेको थियो । जावलाखेलमाथि १-० गोलको जित निकाल्दै पुलिसले महत्वपूर्ण तीन अंक बटुलेको छ ।
यसअघि आजै भएको पहिलो खेलमा थ्री स्टार क्लबले फ्रेन्ड्स क्लबलाई २-१ गोलअन्तरले पराजित गरेको थियो ।
