१ भदौ, पोखरा । पोखरा महानगरपालिका वडा नं १८ बस्ने विनोदबहादुर भट्टराईलाई साउन १ गते तीन जना मिलेर कुटपिट गरे ।
कुटपिटबाट उनको टाउको गहिरो चोट लाग्यो र कुरा प्रहरी कार्यालयसम्म पुग्यो । उनकै बयानका आधारमा प्रहरीले ३ जना आरोपितलाई नियन्त्रणमा लिई अनुन्धान थाल्यो ।
विषय अनुसन्धानकै क्रममा थियो । प्रहरीले कुटपिटमा संलग्न ३ जनालाई कानुनबमोजिम मुद्दा लगाउने तयारी पनि थालिसकेको थियो । तर, त्यहीबेला भट्टराईले नयाँ भूमिका खेले । उनले प्रहरीले नियन्त्रणमा लिएका ती ३ जना आरोपितका परिवारलाई भेटे र भन्न थाले, ‘मैले कास्कीका एसपी, डिएसपी चिन्या छु । मलाई ३ लाख ५० हजार रुपैयाँ देऊ केश मिलाइदिन्छु ।’
जिल्ला प्रहरी कार्यालय कास्की प्रमुख दानबहादुर कार्कीले भट्टराईको भनाइ उधृत गर्दै अगाडि भने, ‘यो ज्यानमारा केशमा पनि जान सक्छ । ३ वर्ष त जेल हुन्छ । तरुन्त मलाई पैसा ल्याऊ । कुरा मिलिहाल्छ ।’ प्रहरीले भट्टराईलाई लागेको चोटको भरपाई गरी उनलाई न्याय दिलाउने गरी काम गरिरहेको थियो । तर, उनले उल्टै प्रहरीको बदनाम गर्नतिर लागे ।
प्रत्येक दिनजसो भट्टराईले आरोपितका परिवारसँग ‘बार्गेनिङ’ गर्न थालेपछि उनीहरुले प्रहरीलाई खबर गरे । प्रहरीले उनलाई साउन २६ गते पक्राउ गरेको छ । उनी अहिले प्रहरी नियन्त्रणमा छन् ।
‘पटकपटक कास्कीका एसपी डिएसपी चिन्या छु भन्दै पैसाको मोटो रकम माग्दै आएका रहेछन्,’ एसपी कार्कीले भने, ‘अहिले हामीले पक्राउ गरी कानुनी प्रक्रिया अगाडि बढाइसकेका छौं ।’
