२ मंसिर, हेटौंडा । प्रदेश ३ लोकसेवा आयोगका अध्यक्ष सुरेशमान श्रेष्ठले शपथ ग्रहण गरेका छन् । उनलाई प्रदेश प्रमुख बिष्णुप्रसाद प्रसाईले सोमबार पद तथा गोपनियताको शपथ गराएका हुन् ।
मुख्यमन्त्री डोरमणी पौडेल नेतृत्वको सिफारिस समितिले कात्तिक २९ गते श्रेष्ठलाई प्रदेश लोकसेवा आयोगको अध्यक्षमा नियुक्त गरेको थियो ।
सपथ ग्रहणपछि अध्यक्ष श्रेष्ठले प्रदेश, स्थानीय तह र निजामती सेवाका लागि उपयुक्त कर्मचारी छनौटमा आफ्नो भूमिका रहने बताए । राजनीतिक दबाव भन्दा पनि आवश्यकता अनुसार कर्मचारीको छनौट र नियुक्तिमा ध्यान दिने उनले बताए ।
२०१५ सालमा लमजुङको दुराडाँडामा जन्मिएका श्रेष्ठले २०४१ सालमा शाखा अधिकृतबाट निजामती सेवा सुरु गरेका थिए । ३२ वर्ष निजामती सेवामा काम गरेका उनी श्रम तथा रोजगार मन्त्रालयको सचिवको जिम्मेवारी सम्हाली सकेका व्यक्ति हुन् ।
