२० जेठ, काठमाडौं । स्पेनिस फुटबल क्लब बार्सिलोनाका पाँच खेलाडीमा कोरोना भाइरस संक्रमण देखिएको र उनीहरु हाल निको भइसकेको एक रेडियोले जनाएको छ ।
क्याटलाना रेडियो स्टेसन आरएसी वानले बार्सिलोनाको पाँच खेलाडीमा कोरोना देखिएको दावी गरेको हो । रेडियोका अनुसार अहिले उनीहरु निको भइसकेका छन् ।
रेडियोले उनीहरुको नाम भने सार्वजनिक गरेको छैन । तर स्पेनमा कोरोना महामारी सुरु हुँदाताका नै बार्सिलोनाका खेलाडीमा संक्रमण देखिएको उसले जनाएको छ ।
यस्तै आरएसीले बार्सिलोनाको दुई जना कर्मचारीमा पनि कोरोना भाइरस संक्रमण देखिएको दावी गरेको छ ।
बार्सिलोनाले यस बारे कुनै समाचार सार्वजनिक गरेको थिएन र रेडियोको पछिल्लो रिपोर्टबारे कुनै प्रतिक्रिया पनि दिएको छैन ।
कोरोना भाइरस महामारीले स्थगित ला लिगा यही जुन ११ देखि फेरि शुरु हुँदैछ र लिग लिडर बार्सिलोनाले जुन १३ मा मालोर्कासंग खेल्दैछ ।
केही दिनअघि कप्तान लिओनल मेसीले कोरोना भाइरसपछि फुटबल र जीवन उस्तै नहुने प्रतिक्रिया दिएका थिए ।
केही साताअघि पहिलो पीसीआर विधिबाट गरिएको परीक्षणमा बार्सिलोनाले क्लबमा कसैलाई पनि पोजेटिभ नदेखिएको जनाएको थियो ।
