१८ पुस, काठमाडौं । नेपाल क्रिकेट संघ (क्यान)ले नियुक्त गरेका क्रिकेट म्यानेजर जनरल म्यानेजर र फाइनान्स म्यानेजरले २०२१ जनवरी १ देखि ओपचारिक रुपमा काम सुरु गरेका छन् ।
डिसेम्बर १५ मा नियुक्त भएका क्रिकेट म्यानेजर विनोद दास, जनरल म्यानेजर रौनक मल्ल र फाइनान्स म्यानेजर रमेश कुमार न्यौपानेले शुक्रबारदेखि कार्यलय पुगेर औपचारिक रुपमा काम सुरु गरेका छन् ।
क्यानले अष्ट्रेलियन विश्वकप विजेता डेव वाटमोरलाई पनि जनवरी १ देखि नै लागु हुनेगरी मुख्य प्रशिक्षक पदमा नियुक्त गरेको छ । क्यान सचिव अशोकनाथ प्याकुरेलले प्रशिक्षक नियुक्त भएपछि वाटमोर जनवरी पहिलो साताको अन्तिमसम्म नेपाल आइपुग्ने बताएका थिए ।
यस्तै खेलाडीहरु उनको आगमनले उत्साहित बनेका छन् । वाटमोर बाहेक क्यानले नियुक्त गरेको अर्का चर्चित पात्र हुन् राष्ट्रिय टिमका पूर्व कप्तान विनोद दास । दासले सन् २००० को दशकमा यू-१९ देखि सिनियर टिमसम्मको कप्तानी गरेका थिए ।
यस्तै उनले प्रशिक्षकको रुपमा यू-१९ पुरुष टिम र महिला सिनियर टिमको प्रशिक्षकको भूमिका निर्वाह गरिसकेका छन् । यस्तै एभरेष्ट प्रिमियर लिगमा समेत उनले काम गरिसकेका छन् ।
पछिल्लो समय नेपाल क्रिकेटको विकास र राष्ट्रिय टिममा सुधार गर्नुपर्ने धेरै विषयका बारेमा दासले खुलेर बोल्दै आएका थिए ।
नेपाली क्रिकेटलाई दुई दशकदेखि नजिकबाट नियालेका दास क्यानको क्रिकेट म्यानेजरकै लागि उपयुक्त पात्र भएकोमा कुनै शंका छैन ।
खेलाडीको रुपमा सफल रहेका दासले अब मैदान बाहिर रहेर नेपाली क्रिकेटको विकासमा कसरी भूमिका खेल्छन् त्यो हेर्न बाँकी छ । सम्भवत उनको करियरको यो तेस्रो इनिङ्सको रुपमा समेत अघि आएको छ । यसअघि उनले पहिला खेलाडी त्यसपछि प्रशिक्षकको रुपमा आफ्नो क्षमता र दक्षता देखाइसकेका छन् ।
अब क्रिकेट म्यानेजरको रुपमा नेपाली क्रिकेटको समग्र विकासको पाटो हेर्नुपर्ने उनको मुख्य जिम्मेवारी हो । जसमा ग्रासरुट लेभलदेखि राष्ट्रिय टिमसम्मको क्रिकेट पर्दछ ।
खासमा के हो त क्रिकेट म्यानेजरको काम ?
धेरै जसो देशमा क्रिकेट विकास गर्न योजना बनाउने डेभलपमेन्ट म्यानेजर राखिएको हुन्छ । नेपालमा पनि डेभलपमेन्ट म्यानेजर वा क्रिकेट डिरेक्टर राख्ने भन्ने कुरा भइरहेको थियो ।
तर नेपाल क्रिकेट संघ (क्यान) अहिले पनि आइसीसीको निलम्बनबाट पूर्णरुपमा उम्किनसकेकाले अहिलेका लागि क्रिकेट म्यानेजर पद राखिएको हो ।
क्यानका अध्यक्ष चतुर बहादुर चन्दले पहिला क्रिकेट डिरेक्टर वा डेभपलपमेन्ट म्यानेजर बनाउने कुरा चलेपनि पछि क्रिकेट म्यानेजरको पद बनाइएको बताए । जसमा काम समग्र क्रिकेट विकास हेर्ने नै हुन्छ ।
चन्दका अनुसार क्रिकेट म्यानेजरको काम पनि डेभलपमेन्ट म्यानेजरको जस्तै हुनेछ । ‘क्रिकेट म्यानेजरको काम राष्ट्रिय-अन्तर्राष्ट्रिय स्तरको प्रोग्रामहरु सेट गर्ने हो,’ चन्दले अनलाइनखबरसँग भने, ‘हामीसँग प्रशासनिक काम हेर्न जनरल म्यानेजर र बर्थिक पाटो हेर्न फाइनान्स म्यानेजर छन् । क्रिकेट म्यानेजरको काम क्रिकेट भित्र पर्ने सबै कुराको प्लानिङ गर्ने हो । समग्र क्रिकेटको म्यानेजमेन्ट पाटो हेर्ने हो ।’
यस्तै चन्दले ग्रासरुट लेभलदेखि जुनियर र सिनियर लेभलसम्मको लागि प्रोग्रामहरु सेट गर्ने काम पनि क्रिकेट म्यानेजरको हुने बताए । ‘जुनियर लेभलदेखि नेपाली टिमको प्रोग्राम सेटअप गर्ने । प्रापोजल बनाएर त्यसलाई इम्पलेमिन्ट गर्ने । डेभलपमेन्ट म्याजेरको रुपमा गर्नुपर्ने सबै काम गर्ने हो,’ चन्दले भने, ‘उदाहरणका लागि भोलि एउटा कुनै टिम बोलाएर सिरिज गर्ने कि भन्ने छ भने त्यसको तयारी गर्ने । प्रपोजल बनाउने लगायत काम गर्ने हो ।’
एक लाइनमा भन्नुपर्दा नेपाली क्रिकेटको ओभरअल डेभलपमेन्टको पाटो हेर्ने काम क्रिकेट म्यानेजरको हो ।
यस्तै अन्तर्राष्ट्रिय सिरिज भएका बेला प्राविधिक पाटाहरु हुन्छन् । त्यसमा क्रिकेट कमिटी र टेक्निकल कमिटीसँग समन्वय गर्ने काम क्रिकेट म्यानेजरको हुनेछ ।
क्यानले उपाध्यक्ष राजेश बाबु श्रेष्ठको संयोजकत्वमा क्रिकेट कमिटी समेत बनाएको छ । तर त्यस कमिटीमा सदस्यहरु भने नियुक्त हुन बाँकी छ ।
यस्तै क्यानले संजयराज सिंहको संयोजकत्वमा ५ सदस्यीय टेक्निकल कमिटी बनाएको छ । जसमा विरेन्द्रबहादुर चन्द, अमितबीर पाण्डे, अरुण कुमार अर्याल र सन्जय गुरुङ सदस्य छन् ।
