२२ भदौ, बुटवल । रुपन्देहीको तिलोत्तमामा एक महिलाको मृत्युलाई माइती पक्षले शंकास्पद भन्दै अनुसन्धान गर्न माग गरेका छन् ।
तिलोत्तमा नगरपालिका–५ की २७ वर्षकी सीता भण्डारी पौडेलको भदौ १९ गते मृत्यु भएको थियो । माइती पक्षले उनको हत्या गरेर आत्महत्या देखाएको भन्दै अनुसन्धान गर्न माग गरेको हो ।
उनीहरुले मंगलबार बुटवलमा पत्रकार सम्मेलन गरी शवको प्रकृति र घटनाक्रम हेर्दा आत्महत्या हुन नसक्ने दावी गरेका छन् । मृतकका बुबा हरिप्रसाद भण्डारीले घटना हुनुअघि ज्वार्इं टीका पौडेलले आफूलाई फोन गरेर धम्कीपूर्ण कुरा गरेको बताए ।
घटनाको अनुसन्धान गर्न माग गर्दै इलाका प्रहरी कार्यालय बुटवलमा किटानी जाहेर दिएपनि प्रहरीले जाहेरी दर्ता नगरेको भण्डारीले गुनासो गरे ।
मृतकका श्रीमानले तानसेनमा होटल व्यवसाय गर्दै आएका छन् । मृतकका देवर हरि पौडेल तिलोत्तमा नगरपालिका–५ का वडा सदस्य भएकाले शक्तिको आडमा पोष्टमार्टम रिपोर्ट गलत देखाइएको भन्दै माइती पक्षले शब बुझ्न मानेका छैनन् ।
इलाका प्रहरी कार्यालय बुटवलका प्रमुख डीएसपी मदन कुँवरले पोष्टमार्टम रिपोर्टमा आत्महत्या गरेको देखिएकाले किटानी जाहेरी लिन नमिल्ने बताए ।
श्रीमानको व्यवहारका कारण सीता भण्डारीले आत्महत्या गर्न बाध्य भएको अनुसन्धानबाट खुलेकाले उनलाई पक्राउ गरी अनुसन्धान सुरु गरिएको डीएसपी कुँवरले बताए ।
प्रतिक्रिया 4