नेता व्यवस्थापन गर्न ‘पावर होलिडे’ को माग

१४ असाोज, बुटवल। नेपाली कांग्रेसका युवा नेता डा. दामोदर भुसालले चुनावमा टिकटका आकांक्षी पुराना नेताहरुको व्यवस्थापन गर्न ‘पावर होलिडे’ लागू गर्नुपर्ने माग गरेका छन् ।

कांग्रेसभित्र टिकटका लागि देखिएको आन्तरिक कलह अन्त्य गर्न दुई पटक सांसद भएका वा दुई पटक निर्वाचनमा परीक्षण भई उपविजेता भएका नेतालाई ‘पावर होलिडे’मा राखेर नयाँलाई अवसर दिनुपर्ने उनको माग छ ।

‘कांग्रेसभित्र टिकटका लागि जुन गुटगत शक्ति संघर्ष र विद्रोहको अवस्था छ, यसलाई रोकेर पार्टीलाई एकजुट बनाउन पावर होलिडेमा जानुपर्छ’, भुसालले अनलाइनखबरसँग भने, ‘यसले कांग्रेसभित्रको मात्र होइन, गठबन्धन र अन्य दलभित्रको असन्तुष्टि पनि व्यवस्थापन हुन्छ ।’

आफूले यो अवधारणा पार्टीका शीर्ष नेताहरुसमक्ष राख्न काठमाडौंमै गएर धेरै दिन प्रयास गर्दा पनि नसकेपछि सञ्चारमाध्यमको सहारा लिनुपरेको खुलाए ।

दलहरुप्रति मतदाताको आशा जीवित राख्न र नयाँ पुस्तालाई गाइड गर्न ५ देखि ७ प्रतिशत मात्रै सिनियर नेतालाई टिकट दिनुपर्ने भुसालको माग छ ।

गुल्मी २ बाट प्रतिनिधि सभा सदस्यमा कांग्रेसबाट उम्मेदवार सिफारिस डा. भुसालले चुनाव लक्षित गठबन्धन अलोकतान्त्रिक हुने भन्दै गठबन्धन गर्दैमा चुनाव जितेर वहुमत आउँछ भन्ने सपना देख्नु गम्भीर भुल हुने बताए ।