दिवालीमा सैफको पुर्ख्यौली गहना लगाउँदा विवादमा करिना, कांग्रेस नेताले पठाए कानुनी पत्र

News Summary

Generated by OK AI. Editorially reviewed.

दिवालीमा ३० क्यारेटको पन्ना जडित र कुरानको आयत कुँदिएको पेन्डेन्ट लगाएपछि करिना कपूर खान विवादमा परेकी छिन्।
कांग्रेस नेता अब्बास हफिजले कुरानको अपमान भएको दाबी गर्दै करीनालाई कानुनी नोटिस पठाएर पेन्डेन्टको तस्बिर हटाउन निर्देशन दिएका छन्।
करिनाकी स्टाइलिस्ट रिया कपुरले उक्त गहना भोपालको शाही परिवारको ऐतिहासिक विरासत भएको बताएकी छिन्।

बलिउड अभिनेत्री करिना कपूर खानले दिवालीमा लगाएको एउटा गहना अहिले विवादित बनेको छ । न त त्यो सामान्य गहना हो, न त यसको इतिहास नै सामान्य छ ।

३० क्यारेटको पन्ना जडित उक्त पेन्डेन्टमा पवित्र कुरानको आयत कुँदिएको छ । यही पेन्डेन्ट दिवालीको अवसरमा लगाएपछि करीना विवादमा तानिएकी हुन् ।

यस विषयलाई लिएर कांग्रेस नेता अब्बास हफिजले करीनालाई कानुनी नोटिस पठाएका छन् । मुस्लिम समुदायका केही व्यक्तिले पनि उनको पहिरनप्रति आपत्ति समेत जनाएका छन् ।

यद्यपि, यसबारे करिनाको कुनै प्रतिक्रिया सार्वजनिक भैसकेको भने छैन ।

के थियो करिनाको दिवाली लुकमा ?

करिनाले सामाजिक सञ्जालमा दिवाली सेलिब्रेसनका केही तस्वीर सार्वजनिक गरेकी थिइन् । तस्वीरमा उनी डिजाइनर पुनीत बलानाले तयार पारेको बेज रंगको कफ्तान र सुहाँउदो पगडीमा देखिएकी छिन् ।

उनको पगडीमा लगाइएको कल्की पनि विशेष थियो । उक्त कल्की अभिनेता सैफ अली खानले करिनासँग विवाह गर्दा लगाएका थिए ।

तर, उनको पहिरनभन्दा बढी चर्चा घाँटीमा लगाएको पेन्डेन्टको भइरहेको छ ।

पेन्डेन्टमा के लेखिएको थियो ?

उक्त पेन्डेन्टमा पवित्र कुरानको आयत ‘आयतुल कुर्सी’ कुँदिएको छ । यो कुरानको दोस्रो अध्याय ‘सूरह अल–बकरा’ को २५५औँ आयत हो ।

मुस्लिम समुदायका केही व्यक्तिको आपत्ति के छ भने कुरानको पवित्र आयत अंकित गहना हिन्दू धर्मको पर्व दिवाली मनाउने क्रममा लगाउनु धार्मिक मर्यादाविपरीत हो ।

उनीहरूले पवित्र धार्मिक वचनलाई यसरी अन्य धार्मिक उत्सवको फेसन वा पहिरनको हिस्सा बनाउनु उचित नभएको तर्क गरेका छन् ।

यही विषयमा कांग्रेस नेता अब्बास हफिजले करिनालाई कानुनी पत्र पठाएका हुन् ।हफिजले पनि कुरानको पवित्र आयत अंकित पेन्डेन्ट दिवालीमा लगाएको भन्दै आपत्ति जनाएका छन् ।

उनले यसलाई कुरानको अपमान भएको दाबी गर्दै करीनालाई पत्र पठाएका हुन् । पत्रमार्फत उनले सामाजिक सञ्जालबाट पेन्डेन्ट लगाएको तस्बिर हटाउनसमेत निर्देशन दिएका छन् ।

करीनाकी स्टाइलिस्ट रिया कपुरले इन्स्टाग्राममा उनको लुकबारे जानकारी दिँदै उक्त पेन्डेन्ट भोपालकी बेगमको ऐतिहासिक गहना भएको बताएकी थिइन् ।

उनका अनुसार यो ३० क्यारेटको पन्ना जडित गहना हो । रिया कपुरका अनुसार करीना कपूरले लगाएका यी गहना भोपालको शाही परिवारको विरासत हुन् ।

सैफ अली खानको परिवार हुँदै यी गहना करीनासम्म आइपुगेका हुन् ।

सैफकी हजुरआमा साजिदा सुल्तान भोपालका अन्तिम शासक नवाबकी छोरी थिइन् । यही कारण भोपालको शाही परिवारसँग जोडिएका यी ऐतिहासिक गहना सैफको पारिवारिक विरासतका रूपमा रहेका छन् ।

करीनाल तस्वीर सार्वजनिक गर्दै ‘दिवाली भनेको परम्परालाई सही तरिकाले निभाउनु हो’ भन्ने आशयको क्याप्सन लेखेकी थिइन् ।