२३ माघ, काठमाडौं । सत्तारुढ नेपाल कम्युनिस्ट पार्टीका सांसदहरुले ललिता निवास प्रकरणमा भ्रष्टाचार मुद्दा चलाउने अख्तियार दुरुपयोग अनुसन्धान आयोगको निर्णय स्वागतयोग्य भएको बताएका छन् ।
राष्ट्रियसभाको बिहीबारको बैठकमा सत्तारुढ दलका सांसदहरुले अख्तियारको निर्णयले भ्रष्टाचार गर्नेविरुद्ध कारबाही हुन्छ भन्ने सन्देश गएको बताएका हुन् ।
नेकपा सांसद बलराम बास्कोटाले अख्तियारको निर्णयले आम जनमानसमा भ्रष्टाचारविरुद्ध अब केही हुन्छ कि भन्ने आशा सञ्चार गरेको बताए । ‘हाइप्रोफाइल भ्रष्टाचार काण्डको रुपमा चर्चित यो काण्ड अझ बढी दबाबरहित, स्वतन्त्र निष्पक्ष रुपमा छानबिन गर्न माग गर्दछु’ उनले भने ।
राष्ट्रियसभा सदस्य रामनारायण विडारीले भ्रष्टाचारविरुद्ध कारबाही चलाउने अख्तियारको निर्णयको स्वागत गर्नुपर्ने बताए ।
सत्तारुढ दलका वरिष्ठ माधव कुमार नेपाल महाचिव विष्णु पौडेललगायतविरुद्ध मुद्धा दायर नभएको र नेपाली कांग्रेस उपभापति विजयकुमार गच्छदारविरुद्ध मुद्धा दायर हुनु वदनियतपूर्ण भएको भन्दै कांग्रेसले विरोध जनाइरहेको छ ।
सांसद विडारीले भने ‘लामो समयसम्म पदमा बसेको उपप्रधानमन्त्री, मन्त्री सचिव, धनाड्य घरानाहरु, उद्योगपति, र अपराधि कर्मचारीलाई सजाय गर्न मुद्धा चलाउने सरकार र आयोगलाई धन्यवाद दिनुपर्नेमा मेरो मान्छेलाई किन कारवाही गरियो भनेर विरोध भइरहेको छ’ उनले भने ।
उनलेअगाडि भने ‘यो सरकारले गजब गर्यो अब केही हुन्छ पो भन्नुपर्ने होइन र ? एकथरी मान्छे सधै विरोध, कारवाही नगरे खै कारवाही भन्छ, कारवाही गरे फलानो लाई किन नगरेको मेरो मान्छेलाई किन गर् त्यो अर्कोलाई किन नगर्या भन्छ ।’
