१३ पुस, काठमाडौं । इंग्लिस प्रिमियर लिग फुटबलमा टोटनहृयामले म्यानचेष्टर युनाइटेडलाई बराबरीमा रोकेको छ ।
आइतबार राति भएको खेलमा गोलरहित बराबरीमा रोक्दै टोटनहृयामले उपाधि होडमा चेल्सी र म्यानेचष्टर सिटीलाई दबाव दिने युनाइटेडको प्रयासमा धक्का दिएको छ ।
टोटनहृयामको घरेलु मैदानमा भएको खेलमा युनाइटेडले पहिलो हाफमा गोल गर्ने केही राम्रा अवसरहरु सृजना गरेको थियो । माटाको प्रहार पोलमा लगेर फर्कियो भने गोलरक्षक हृयुगो लोरिसले फल्काओ, रोविन भानपर्सी र एश्ले योङको प्रयास असफल पारे ।
फिलिप जोनको हेडर यान भोटाङ्गनले गोललाइनबाट एक्रोव्याटिक क्लियर गरेका थिए भने रेफ्रीले अफसाइड दिए । खेलमा दुबै टोलीले केही राम्रो मौका पाए पनि गोल गर्न सकेनन् र अंक बाँडेका छन् ।
बराबरीपछि युनाइटेड ३६ अंकका साथ तेस्रो स्थानमा छ भने ३१ अंक जोडेको टोटनहृयम आठौं स्थानमा छ ।