१५ फागुन, काठमाडौं । भारतबाट भित्रिएको स्वाइनफ्लु संक्रमितको संख्या नेपालमा २३ पुगेको छ । रोग नियन्त्रणको जिम्मेवारी पाएका अधिकारीहरुले रोग नियन्त्रणका लागि सरकारसँग बारम्बार बजेट माग्दा पनि नपाएको गुनासो गरेका छन् ।
शुक्रबार काठमाडौंको थप एकजनामा एचवान एनवान भाइरसको संक्रमण पुष्टि भएसँगै स्वाइन फ्लु संक्रमितको संख्या २३ पुगेको हो ।
टेकुस्थित शुक्रराज सरुवा रोग अस्पतालमा स्वाइनफ्लु हो कि भन्दै शंका लागेर जाँच गराउन सरदर दैनिक १० जना बिरामीहरु आउने गरेको अस्पताल प्रमुख शेरबहादुर पुनले बताए ।
स्वाइनफ्लुको शंका लागेमा उनीहरुको थुक नमूना परीक्षणका लागि इपिडिमियोलोजीमा पठाउने गरिएको छ । सामान्य विरामीहरुलाई प्रशस्त पानी पीउन, झोलपदार्थ खान, घरमै आराम गर्न, मास्क प्रयोग गर्न र रुघा खोकी लागेमा अस्पतालमा गएर जचाउन उनले सुझाव दिए ।
सरकार भन्छ-बजेट छैन
भारतमा महामारीको रुपमा फैलिएको स्वाइनफ्लु नेपालमा पनि भित्रन सक्ने भन्दै सरकारले हाल काँकरभिट्टा, वीरगन्ज, सुनौली, रुपैडिहा र गड्डाचौकीमा ‘हेल्थडेस्क’ नाम दिएर स्वास्थ्य जाँच चौकी स्थापना गरेको छ । तर, ती जाँचस्थल औषधि र उपचार उपकरण अभावमा प्रभावहीन देखिएका छन् । खर्च अभावमा ती हेल्थ डेस्क गुज्रिरहेका छन् ।
नेपाल र भारतसँग जोडिएका ८० सीमा नाकाबाट आवात-जावत हुन्छ । तर, बजेट अभावमा ती सबै नाकामा स्वास्थ्य जाँच चौकी स्थापना गर्न नसकिएको इपिडिमियोलोजी तथा रोग नियन्त्रण महाशाखा प्रमुख मरासिनीले बताए ।
जाँच चौकीमा २४ सै घण्टा स्वास्थ्यकर्मी खटाउनुपर्छ । यसरी खटाउँदा ८-८ घण्टाको दरले तीन सिफ्टमा राख्नुपर्छ । उनीहरुलाई दिने पारिश्रमिक, औषधि उपकरण लगायतको व्यवस्था गर्दा ८० नाकामा मासिक सरदर ५९ लाख खर्च हुने अधिकारीहरु बताउँछन् ।
‘सम्वन्धित निकायमा धेरैपटक कुरा राखिसकियो, तर बजेट छैन भन्ने जवाफ आउँछ,’ मरासिनीले भने ।
हेल्थ डेस्क नै ‘अवैध’
स्वाइनफ्लु नियन्त्रणका लागि भन्दै सरकारले भारतसँग जोडिएका सीमानाकामा स्थापना गरेका हेल्थडेस्क नै गैरकानुनी रहेको अधिकारीहरु बताउँछन् ।
सीमानाकामा स्वाइनफ्लुको संक्रमण जाँचको अन्तराष्ट्रिय नियम छैन । तर, सरकारले नेपाल-भारतका पाँचवटा सीमानाकामा हेल्थडेस्क स्थापना गरेको छ ।
‘भारतले अब्जेक्सन गरे तुरुन्तै हटाइहाल्नुपर्छ,’ इपिडिमियोलोजी तथा रोग नियन्त्रण महाशाखाका प्रमुख बाबुराम मरासिनीले अनलाइनखबरसँग भने, ‘कुनै पनि देशको सीमा क्षेत्रमा विश्व स्वास्थ्य संगठनले स्वाइनफ्लुको परीक्षण गर्न अनुमति दिँदैन ।’