श्रीधर पौडेल
२६ वैशाख, काठमाडौं । भूकम्प प्रभावित भक्तपुर नगरको सरसफाइमा सहभागी हुन दिइएको निर्देशन पालना गर्दै निजामति कर्मचारीहरु शनिबार विहान भक्तपुर पुगे ।
विहान ७ बजेदेखि नै कर्मचारीको टोली भक्तपुरका गल्ली गल्ली र चोक चोकमा खटिए तर खाली हात । उनीहरुसँग भग्नावशेष पन्छाउने साधन केही थिएन । हातमा केही थियो त, महंगो आइफोन वा सामसुङ मोबाइल ।
उद्धारमा खटिएका केही कर्मचारीहरु काम भन्दा धेरै फोटो खिच्न व्यस्त देखिए । कोही सेल्फी खिच्दै थिए भने कोही समूह समूहमा पालैपालो क्यामरामा तस्वीर कैद गर्दै थिए ।
सञ्चार मन्त्रालयका सचिव सुनिलबहादुर मल्लले भक्तपुर पुगेको मौकामा त्यहाँको इतिहास बुझ्ने मौका पाए । उनलाई गोरखापत्रका एक कर्मचारीले तलेजु भवानी मन्दिर क्षेत्रमा लगेर तलेजुसँग सम्वन्धित किम्बदन्ती, साँस्कृतिक परम्परा र मल्लकालीन इतिहास सुनाउँदै थिए ।
कामभन्दा भीड धेरै
सरसफाइ र उद्धारमा खटिएको कर्मचारीहरुको भिड अव्यवस्थित थियो । कतिपय फोटो लिन, काँक्रा किन्न, चिया पसलमा झुम्मिएको भेटिए । यस्तो लाग्थ्यो, कर्मचारीहरु काम भन्दा समय कटाउने मेलोमा लागेका छन् । यस्तो देखिनुको प्रमुख कारण थियो अव्यवस्थित परिचालन ।
सूचना तथा सञ्चार मन्त्रालयका उपसचिव कुमार खड्काले अनलाइनखबरसँग भने-‘व्यवस्थापनमा अलि समस्या देखियो । हामी धेरै भयौं, एकै ठाउँमा थुपि्रयौं । अबदेखि व्यवस्थितरुपमा परिचालन गर्नुपर्छ ।’
