नवराज पथिक
२९ वैशाख,रामेछाप । भूकम्पले घरबार गुमाएकाहरुलाई औषधि उपचारका नाममा ‘स्वर्ग खुला छ’ भन्दै बाइबल हातमा थमाइदिएपछि रामेछाप सदरमुकाम मन्थलीमा तनाव भएको छ ।
गुड पिपुल नामको संस्थाले भूकम्प पीडितका लागि भनेर वैशाख २६ देखि सञ्चालन गरेको स्वास्थ्य शिविरमा औषधि होइन, इशाई धर्म प्रचार सामाग्री वितरण गरिएपछि स्थानीयले बिरोध गरेका हुन् ।
भारतको सिक्किमबाट रामेछाप पठाएको थोत्रा कपडाको प्रसंग सेलाउन नपाउँदै कोरियाको सो संस्थाले भूकम्प प्रभावित जनताको पीडामा नूनचुक छर्ने काम गरेको भन्दै शिविर स्थगन गराइएको छ ।
स्वास्थ्य शिविरमा जाँच गराउन जाने सबै सर्वसाधारणलाई क्रिश्चियन धर्मको प्रचार गरिएको ‘स्वर्ग खुला छ’ भन्ने ब्रोसर भिडाइएको थियो ।
सो ब्रोसर बाँड्नका लागि ठूलो संख्यामा स्वयम्सेवीहरु समेत सो संस्थाले परिचालन गरेको थियो । त्यसमा सबैको रक्षा जिसस क्राइष्टले मात्र गर्न सक्ने सन्देश दिइएको सहभागीहरुले बताए ।
सबै खालका रोगको उपचार गरिने भनी प्रचार गरिएको सो शिविरमा जाँच गराउन जाने सबै बिरामीहरुलाई भिटामिन बी क्याप्सुलहरु दिइएको छ ।
घण्टौँ लाइन लागेर उपचार गराउन गएका भूकम्प पीडित विरामीहरुको सामान्य प्राथमिक उपचार पनि नभएपछि उपचार गराउन जानेसमेत आक्रोषित भएका थिए । उनीहरुले विपतका बेलामा सहयोग गर्ने भनेर धर्म प्रचार गरिएको भन्दै आपत्ति जनाएपछि तामाकोशी सेवा समितिले शिविर स्थगन गर्न दबाव दिएको थियो ।
क्रिश्चियन धर्म प्रचारकहरु अहिले रामेछापका गाउँ गाउँमा बाइबल र धर्म प्रचारका अन्य सामाग्री बोकेर सैतानले गर्दा भूकम्प आएको भन्दै सबैले इशाई धर्म अँगाल्ने हो भने विपत्ति नआउने भन्दै हिँडेको शिक्षक कमल सुनुवारले बताए ।
रामेछापके सैपू, दुरागाउँ, भूजी लगायतका दलित र आदिवासी बस्तिमा इशाई धर्म अँगालेमा राहत दिने भन्दै चामलका बोरा लिएर धर्म प्रचारकहरु हिँडिरहेको दुरागाउका स्थानीय बेनवहादुर गुरुङले बताए ।
यसैबीच दुरागाउ गाविसका सचिव लेखनाथ चौलागाईले गाउँमा धर्म प्रचारका लागि कुनै पनि अवान्छित गतिबिधि हुन नदिने बताएका छन् । विपत्तिका बेला सबैले जाति, धर्म र राजनीतिभन्दा माथि उठेर सबै पीडितलाई सघाउनुपर्ने उनले बताए ।
राहतका नाममा धर्म प्रचारमा कोरियन नागरिकहरु हिँडेका छन् । पछिल्लो समय राहत वितरणका नाममा बाइबल बितरण गरेर पीडितलाई थप पीडा दिने काम भइरहेको नागरिक अगुवा ज्ञानवहादुर गुरुङले बताए ।
