पशु बीमातर्फ आकर्षण बढ्दो

२१ असोज, पाल्पा । रामपुर नगरपालिका–८ सानीअमराईका अगुवा कृषक वासुदेव ढुङ्गानाले ब्याउनी भैँसी मरेपछि बीमा बापत सोह्र हजार बुझे ।

सीताकुण्ड दुग्ध उत्पादक सहकारी संस्थामा कृषक ढुङ्गानाले उक्त भैँसीको बीस हजारमा बीमा गरेका थिए । भैँसी मरेपछि बीमा गरेको रकमको ८० प्रतिशत क्षतिपूर्तिबाट सो रकम बुझेका हुन् ।

‘मैले भैँसी मरेकै दिन संस्थामा खबर गरेको थिएँ, त्यसको भोलिपल्टै संस्थाले घरमै क्षतिपूर्ति रकम ल्याएर दियो ।’ उनले भने। भैँसीको क्षतिपूर्ति रकम बुझ्दै उनले सहकारीले किसानको हकहितको लागि काम गर्दै आएकाले सबैले आफ्ना पशुबीमा गरी नोक्सानी व्यहोर्नबाट बच्न आग्रह गरे ।

रामपुर–९ प्याक्लुकका कृषक रामचन्द्र ढुङ्गानाले रु पचास हजार बराबरको बीमा गरेको लैनो भैँसी मरेपछि ३२ हजार क्षतिपूर्ति रकम पाएको बताए । ‘सहकारीमा भैँसी बीमा नगरेको भए मेरो रु पचास हजार डुब्थ्यो, बीमा गरेको हुँदा भैँसी मरेपनि ठूलो क्षति भोग्नु परेन ।’ उनले भने ।

सहकारीले पशु अनुत्पादक क्षति भइहालेमा पनि क्षतिपूर्ती रकम किसानलाई उपलब्ध गराउँदै आएको छ । रामपुर–७ बेझाडका कृषक गुरुप्रसाद रेग्मीले अनुत्पादक भैँसीको  ५ हजार क्षतिपूर्ति रकम बुझेका छन् ।

संस्थाले अहिलेसम्म बीमा गरेका पशुमध्ये १७ वटाको पूर्ण क्षति र २० वटालाई अनुत्पादक क्षतिपूर्ति रकम किसानलाई दिएको अध्यक्ष कृष्णकुमार अर्यालले बताए ।

क्षतिपूर्ति रकम पाइने भएपछि किसानहरु अहिले पशु बीमासहित व्यवसायिक रुपमा पशुपालनतर्फ आकर्षित भएका छन् । सीताकुण्ड दुग्ध उत्पादक सहकारीद्वारा सञ्चालित पशुधन सुरक्षण समितिमा बीमा गरेका किसानको पशु क्षति भइहालेमा क्षतिपूर्ति रकम उपलब्ध गराउन थालेपछि पशु बीमातर्फ किसानको आकर्षण बढेको हो ।

सहकारीले पाँच प्रतिशत प्रिमियम छुटमा घरदैलोमा नै गएर पशु बीमा गर्ने सेवा किसानलाई दिँदै आएको छ । पशु क्षति भइहालेमा किसानको लगानी नडुबोस् र पशुपालन क्षेत्रमा अभिप्रेरित गराउने उद्देश्यले सञ्चालन गरेको पशु बीमा कार्यक्रमले पशुपालक किसानलाई ठूलो फाइदा पुगेको समितिका संयोजक नगिलाल पौडेलले बताए ।

संस्थामा पशु बीमा गर्ने किसानलाई सहकारीले एक सेयरसमेत थप गरिदिने भएको छ । विसं २०६३ देखि पशु बीमा कार्यक्रम सुरु गरेको समितिले अहिलेसम्म एक हजार ७७ पशुको बीमा गरेको छ । जसमा भैँसी ७१६, गाई ३८७, बाख्रा ४१ र बङ्गुर २८ वटा रहेको संस्थाका व्यवस्थापक हरिप्रसाद सिग्देलले बताए ।

सहकारीले रामपुर नगरपालिकासहित जिल्लाका विभिन्न गाविस तथा नवलपरासी, तनहुँ, स्याङ्जाका विभिन्न स्थानका किसानको घरदैलोमा गई पशु बीमा गर्दै आइरहेको छ । समितिले बीमा गरेका पशुका लागि समयसमयमा जुका, माटेका औषधि तथा विभिन्न रोगका भ्याक्सिन निःशुल्क रुपमा उपलब्ध गराउँदै आएको सहकारीले जनाएको छ ।