८ मंसिर, काठमाडौं । भारतीय हस्तक्षेप तथा नाकाबन्दीको विरोधमा काठमाडौंमा शक्ति प्रदर्शन गर्दै नेत्रविक्रम चन्द विप्लव नेतृत्वको नेकपा माओवादीले जनसरकारको घोषणा गरेको छ ।
रत्नपार्कको शान्तिबाटिकाबाट सुरु भएको प्रदर्शनको नेतृत्व खड्गबहादुर विश्वकर्मा, धमेन्द्र वास्तोला लगायतले गरेका थिए । र्याली जमल, कमलादी, पुतलीसडक, न्यूरोड हुँदै शान्ति बाटिकामा पुगेर सभामा परिणत भएको थियो ।
जनप्रदर्शनका लागि उसले आसपासका जिल्लाहरुबाट समेत कार्यकार्ताका साथै विद्यार्थीहरु विद्यालय पोसाकमै ल्याएको थियो ।
सभामा क्रान्तिकारी जन परिषद् गठन गर्दै सन्तोष बुढा मगरलाई जन सरकार प्रमुख घोषणा गरिएको छ । उनी पूर्व सभासद समेत हुन् । पूर्व सभासद पदम राई जनसरकार उपप्रमुख हुन् ।
जनसरकारमा १६ जना रहनेछन् । जनसरकारले भारतीय नाकाबन्दीको विरोधमा १३ गते नेपाल बन्द गर्ने घोषणा गरेको छ ।
