१८ साउन, काठमाडौं । भारतीय प्रधानमन्त्री नरेन्द्र मोदी काठमाडौं आउनुअघिसम्म राजधानीमा यसरी सिँगापटार गरिएको छ कि दशैंमा पनि यस्तो गरिँदैन । छिमेकी देशका नेता भ्रमणमा आउँदा कतिसम्म तामझाम गर्न हुन्छ र गर्नुपर्छ भन्ने कुनै नीति नभएकाले नेपाल सरकाले गरेका क्रियाकलापमाथि सामाजिक सञ्जालमा समेत आलोचनात्मक टिप्पणी हुने गरेका छन् ।
मोदीको भ्रमणका क्रममा दुईदिन उपत्यकाका विद्यालय बन्द गरेर वालवालिकाको पढाइलाई अवरुद्ध पारिएको छ । शनिबारदेखि नै काठमाडौं छिर्ने नाकाहरुमा संकटकालमा जस्तै सर्वसाधारणलाई लामो लाइन लगाएर चेकिङमा सास्ती दिइएको छ ।
काठमाडौं शहरका अकाशे पुलहरुमा मोदीको फोटोसहतिका फ्लेक्स बोर्डहरु टाँगिएका छन् । सिंहदरबारदेखि संविधानसभासम्म नेपाल र भारत दुबै देशका झण्डाहरु फहराइएका छन् । मोदी बस्ने हायत होटल छेऊछाऊ विजुलीका पोलमा समेत चुनाब आएको जस्तो गरी मोदीका तस्वीरहरु टाँगिएका छन् । संविधानसभा भवन परिसरलाई बेहुलीजसरी सिँगारिएको छ ।
मोदी हिँड्ने बाटोमा रहेका सडकका डिभाइडरहरु हटाइएका छन् । बाटोको धूलो सफा गरिएको छ र पानीले सडक पखालेर चिल्लो बनाउने प्रयास गरिएको छ । मोदी हिँड्ने बाटोमा सवारी आवागमन ठप्प पार्ने र चक्का जाम गर्ने सरकारले निर्णय गरेको छ ।
भारतीय प्रधानमन्त्रीको भ्रमण पूर्व गरिएको यस्तो तडक-भडक स्वाभाविकै हो या बढ्ता गरियो भन्नेबारे जनमानसमा चर्को बहस भइरहेको सामाजिक सञ्जालमा आएका प्रतिक्रियाले स्पष्ट पारेका छन् । पशुपतिको दर्शनमा आउन लागेका मोदीका विषयमा अहिल बढी नै चर्चा परिचर्चा भएको गुनासाहरु पनि सुनिन थालेका छन् ।
मोदी भ्रमणपूर्व सिंगारिएको राजधानीका केही दृश्य यस्ता छन्: