२७ मंसिर, काठमाण्डौ । एनसेलको आयोजनामा हुन लागेको पर्पल फेष्ट कार्यक्रमको टिकटका लागि डाटा खरिद गरेका ग्राहकले पैसा फिर्ता पाएपनि आफुले किनेको डाटा भने फिर्ता गर्नु नपर्ने भएको छ ।

एनसेलले एक सूचना जारी गरी काठमाण्डौ र बनेपाका एनसेल सेन्टरबाट ग्राहकले पुस ३० गतेभित्र पैसा फिर्ता लिन सक्ने जनाएको छ ।

एनसेलका संचारबिज्ञ मिलनमणि शर्माले अनलाइनखबरसँग भने-‘डाटा किन्दा लागेको पैसा फिर्ता दिन्छौं तर, ग्राहकले किनेको डाटा फिर्ता गर्नुपर्दैन ।’

एनसेलले भारतीय कमेडियन कपिल शर्मा र गायक सोनु निगमका साथमा नेपाली कलाकारको जमघट गराई आज दशरथ रंगशालामा पर्पलफेष्ट कार्यक्रम आयोजना गर्ने तयारी गरेको थियो ।

तर, जिल्ला प्रशासन काठमाण्डौले अन्तिम समयमा सुरक्षाको कारण देखाउँदै कार्यक्रम स्थगित गर्न आदेश दिएपछि एनसेलले गएरातीमात्रै कार्यक्रम रद्द गर्ने निर्णय गरेको थियो ।

टिकटका लागि एनसेलको डाटा खरिद गरेका ग्राहकको मोबाइलमा आज बिहानै एसएमएस पठाएर कार्यक्रम रद्द भएकोे जानकारी गराइएको शर्माले जानकारी दिए ।

कार्यक्रमका मुख्य आर्कर्षण कपिल शर्माले गएराती आफु भोली नेपाल आउन लागेको ट्वीट गरेपछि केही फ्यान अलमलमा परेका थिए । ‘हामीले बेलुकी ९ बजेतिरै कार्यक्रम रद्द भएकोबारे कपिलका म्यानेजरलाई जानकारी गराएका थियौं, तर, कपिलले म्यानेजरसँग सम्बाद नगरी ट्वीट गरेको जस्तो देखियो’ एनसेलका संचारबिज्ञ मिलनमणि शर्माले भने-‘कार्यक्रम रद्द भएकै हो, त्यसका कारण कन्फ्युज हुनुपर्दैन् ।’

कार्यक्रम रद्द हुँदा भएको आर्थिक क्षतिबारे अहिले नै केही भन्न नसकिने शर्माले बताए । ‘मुख्य कुरा हाम्रा ग्राहकले कपिल शर्मालाई भेट्ने र रमाउने अबसर पाउनुभएन, अन्तिम समयमा रद्द हुँदा राम्रो सन्देश गएन’ शर्माले भने- सवै तथ्याङ्क संकलनपछि मात्र आर्थिक क्षतिबारे भन्न सक्छौं ।’

यस्तो थियो अन्तिम तयारी

जिल्ला प्रशासनले शुक्रबार अबेरमात्र सुरक्षा दिन नसक्ने भन्दै कार्यक्रम रद्द गर्न भनेको थियो । त्यतिबेलासम्म रंगशालामा कार्यक्रमको तयारी अन्तिम चरणमा थियो । स्टेज बनाइसकिएको थियो भने लाइट फिट गरेर परिक्षण गरिदै थियो ।

कपिलसँग भेटका लागि काठमाण्डौ बाहिरबाटसमेत प्रसंसकहरु काठमाण्डौ आइसकेका थिए । रंगशालामा प्रहरीले सुरक्षा दिइरहेको थियो । तर, कार्यक्रम स्थगित भएको खवर आएपछि राति २ बजेतिर फिट गरिएका लाइट निकाल्न थालियो भने स्टेज पनि भत्काउन थालियो ।

कार्यक्रमको ब्यबस्थापन गरिरहेको लेमन मिडियाका प्रतिनिधि भन्दैथिए- लाइटकै लागि हामीले लाखौैं खर्च गरेका थियौं, कम्तीमा दिउँसोसम्म खवर गरिदिएको भएपनि यति ठूलो क्षति हुने थिएन् ।’

तस्वीरः श्रीधर पाैडेल